१५ भाद्र २०८०, शुक्रबार
१५ भदाै, सिन्धुपाल्चोक । आठ वर्षदेखि बन्द रहेको तातोपानी नाका आजबाट मानिसका लागि दुईतर्फी आउजाउ खुल्ला भएको छ । आयात निर्यात खुले पनि मानिसका लागि आठ वर्षसम्म नाका आउजाउका लागि खुलेको थिएन ।
प्रमुख जिल्ला अधिकारी रमेश न्यौपानेका अनुसार चिनियाँ अधिकारीले शुक्रबार अर्थात् सेप्टेम्बर १ बाट मानिसका लागि दुवैतर्फी नाका खुल्ने भए अनुसार नाका खुलेको हो । पहिलो चरणमा सीमा क्षेत्रका स्थानीयलाई २४ घण्टे पास उपलब्ध गराई आउजाउ खुलेको छ ।
तातोपानी नाका प्रमुख भन्सार अधिकृत दयानन्द केसीले तिब्बततर्फ पुलबजारसम्म आउजाउ गर्न दिइने जानकारी आएको र बिस्तारै सरकारी पहलमा खासासम्म आउजाउ गर्न दिइने बताए ।
नेपालतर्फका अध्यागमन कार्यालयले सीमा क्षेत्रका स्थानीयलाई २४ घण्टे पासको प्रबन्ध मिलाएको जनाएको छ । २०७२ वैशाख १२ को भूकम्प र त्यसपछिको पराकम्पका कारण उक्त नाका पूर्ण रूपमा बन्द हुँदै आएको थियो ।
२०७६ जेठबाट आयातका लागि एकतर्फी आंशिक खुलेको सो नाका कोरोना महामारी, बाढीपहिरो, सडकलगायतका बहानामा बन्द हुँदै र आंशिक खुल्दै आएको थियो । वैशाख १८ गतेबाट आंशिक रूपमा निर्यात खुलेको थियो ।
प्रकाशित मिति: १५ भाद्र २०८०, शुक्रबार
