११ भाद्र २०८०, सोमबार
११ भदाै, डोल्पा । नेपाली सेनाको दुनैस्थित एक गुल्मका गुल्मपति दुई दिनदेखि बेपत्ता भएका छन् । सदरमुकाम दुनै सुरक्षार्थ नन्दबक्स गुल्मका गुल्मपति मेजर विमल पण्डित बेपत्ता भएका हुन् ।
जिल्ला प्रहरी कार्यालय डोल्पाका प्रमुख प्रहरी नायब उपरीक्षक शिव बुढाथोकीका अनुसार आइतबार अपराह्न ३ बजे बजार घुमेर आउँछु भनि भदालेस्थित गुल्म निस्किएका गुल्मपति पण्डित साँझसम्म पनि नफर्किएपछि खोजी कार्य भएको थियो ।
त्रिपुरासुन्दरी नगरपालिकाको केन्द्र रहेको त्रिपुराकोट र जुफाल बजारलगायतका स्थानमा आइतबार साँझदेखि नै खोजी गर्दा पनि गुल्मपति पण्डित कतै नभेटिएको प्रहरी नायब उपरीक्षक बुढाथोकीले जानकारी दिए ।
दुई दिनदेखि बेपत्ता पण्डितको मोबाइल नम्बर पनि अफ भएको बताइएको छ ।
बेपत्ता गुल्मपति पण्डितको नेपाली सेना, नेपाली प्रहरी र सशस्त्र प्रहरी बलका टोलीले खोजी कार्य जारी राखेको जिल्ला प्रहरी कार्यालय डोल्पाले जनाएको छ ।
प्रमुख जिल्ला अधिकारी भूमिश्वर पोखरेलले उनि सम्पर्कमा नआएकाले खोजी कार्य जारी राखिएको बताए । अङ्गरक्षकलाई समेत नलिएर एक्लै हिँड्नु भएकाले पनि के कामले कता जानुभएको हो भन्ने कुरा जानकारी हुन समस्या भएको प्रजिअ पोखरेलले बताए ।
प्रकाशित मिति: ११ भाद्र २०८०, सोमबार
