१० असार २०८०, आईतवार
१० असार, काठमाडाैँ । राष्ट्रिय स्वतन्त्र पार्टीका सांसद मनिष झाले उपराष्ट्रपतिको पद आवश्यक नभएको बताएका छन् । आइतबार प्रतिनिधि सभा बैठकमा बोल्दै सांसद झाले देशमा उपराष्ट्रपतिको पद आवश्यक नभएको बताएका हुन् ।
उनले हालसम्म उपराष्ट्रपतिको पदले सम्झनलायक कुनैपनि काम गर्न नसकेको भन्दै यसको औचित्य माथि प्रश्न उठाए । उनले उपराष्ट्रपतिले गर्ने काम राष्ट्रिय सभा अध्यक्षले नै गर्नसक्ने व्यवस्था गर्नुपर्ने समेत बताए ।
उनले भने, “उपराष्ट्रपतिको पद संवैधानिक अभ्यास गरेपश्चात् आजसम्म पाँच हजार एक सय १५ दिन भएको रहेछ । चार वटा कार्यकाल, तीन वटा अनुहार । त्यो हेर्दै गर्दा सम्झिन लायकको कुराहरू के छ त ? पाँच हजार एक सय १५ दिनले यो पदले सम्झिन लायक कुनै पाँच वटा कुरा हामी सम्झिन सक्छौँ ? हामी यो पदको परिकल्पना गर्दैनौँ । हामी यो पद आवश्यक छैन भन्छौँ । र राष्ट्रिय सभाको अध्यक्षले नै यसको काम गर्नसक्छ भन्छौँ ।”
यस्तै, कर र खर्च कटौतीका लागि अनावश्यक पद राखिरहन नहुने समेत उनको भनाइ छ ।
प्रकाशित मिति: १० असार २०८०, आईतवार
