२३ जेष्ठ २०८०, मंगलवार
२३ जेष्ठ ,काठमाडौँ । राष्ट्रिय समाचार समिति र काठमाडौँ महानगरपालिकाबीच समाचार सामग्री सङ्कलन, सम्प्रेषण र प्रयोगसहित विविध क्षेत्रमा सहयोग र सहकार्यका विषयमा छलफल भएको छ ।
रासस केन्द्रीय कार्यालय भद्रकालीमा महानगरका प्रवक्ता र सूचना तथा सञ्चार महाशाखा प्रमुखसहितको प्रतिनिधिमण्डल र राससका शीर्ष पदाधिकारीबीच समाचार सम्प्रेषणसहित संस्थागतरूपमा गर्न सकिने सहयोग र सहकार्यलगायतका विषयमा छलफल भएको हो ।
सो अवसरमा राससका कार्यकारी अध्यक्ष धर्मेन्द्र झाले सङ्घीय राजधानी रहेको काठमाडौँ महानगरपालिकासँग सम्बन्धित समाचार सामग्री प्राथमिकताका साथ सम्प्रेषण गरिरहेको स्पष्ट गर्दै समाचार सामग्री सम्प्रेषणका अतिरिक्त सम्भावित अन्य क्षेत्रमा सहयोग र सहकार्यको प्रस्ताव गरे ।
राससको समाचार सेवा, समाचार सामग्रीको प्रयोग एवं प्रभाव, सेवाग्राही भएवापत समितिलाई व्यहोर्नुपर्ने शुल्कलगायतका विषयमा जानकारी गराउँदै अध्यक्ष झाले सत्यतथ्य, आधिकारिक र विश्वसनीय समाचार सामग्री सम्प्रेषण गर्ने जिम्मेवारी रहेको राससलाई विश्वास गरी लाभान्वित हुन काठमाडौँ महानगरपालिकाको ध्यानाकर्षण गरे ।
महानगरपालिकाका प्रवक्ता नवीन मानन्धरले सूचना र समाचार सम्प्रेषणका क्षेत्रमा व्यावसायिक एवं दक्ष जनशक्ति रहेको राससजस्तो महत्वपूृर्ण एवं जिम्मेवारी निकायबाट आएको सहयोग र सहकार्य प्रस्तावलाई यथासक्य छिटो कार्यान्वयनमा लगि लाभान्वित हुनेपर्नेमा जोड दिए ।
महानगरपालिकाका सूचना तथा सञ्चार विभाग प्रमुख नमराज ढकालले समाचारका अतिरिक्त सामाजिक, सांस्कृतिक, सूचना प्रविधिलगायतका क्षेत्रमा सहयोग र सहकार्य गर्न सकिने धारणा व्यक्त गरे ।
राससका महाप्रबन्धक सिद्धराज राई, प्रमुख समाचारदाता उत्तम सिल्वाल र प्रधानसम्पादक एकराज पाठकले राससको कार्यसञ्जाल, समाचार सेवा, समाचार सम्प्रेषण गर्नुअघिको प्रक्रिया, सेवाग्राही सङ्ख्या र समाचारको प्रभावका विषयमा जानकारी गराउँदै काठमाडौँ महानगरपालिकासँगको सहयोग र सहकार्यको प्रस्ताव कार्यान्वयनमा जोड दिए ।
यसअघि प्रवक्ता मानन्धरसहितको प्रतिनिधिमण्डलले गणतन्त्र दिवसका उपलक्ष्यमा रासस केन्द्रीय कार्यालयमा प्रदर्शित हाम्रो संस्कृति हाम्रो सम्पदा विषयक तस्बिर प्रदर्शनी अवलोकन गरेका थिए । प्रदर्शनी यही जेठ ११ गतेदेखि रासस केन्द्रीय कार्यालयमा सञ्चालन भइरहेको छ ।
प्रकाशित मिति: २३ जेष्ठ २०८०, मंगलवार
