मुलुक ‘सर्वसत्तावाद’ तर्फ धकेलियोः राप्रपा अध्यक्ष लिङदेन

काठमाडौं। राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले लोकतन्त्रको आडमा मुलुक ‘सर्वसत्तावाद’ तर्फ उन्मुख भएको बताएका छन् ।

बुधवार पार्टीको काठमाडौं जिल्ला कार्यसमितिको कार्यक्रमलाई सम्बोधन गर्दै उनले विधि र कानूनभन्दा आदेश र लहरका भरमा राज्य सञ्चालन भइरहेको आरोप लगाएका हुन् । अध्यक्ष लिङदेनले पछिल्लो समय सरकारी निकायहरूमा भइरहेका विवादास्पद निर्णय र कर्मचारी सरुवालाई सरकारको स्वेच्छाचारी चरित्रको संज्ञा दिएका छन् । उनले विशेषगरी सुनकोशी मरिण डाइभर्सन आयोजना र राहदानी विभागका घटनाहरूमा राज्यको भुमिका शङ्कास्पद रहेको औंल्याएका छन् । पक्राउ गरिएका अधिकारीहरूलाई कुन सम्झौताका आधारमा मुक्त गरियो भनी प्रश्न गर्दै उनले यसको जवाफदेहिता सरकारले लिनुपर्ने बताएका छन् । १६ अर्बको टेण्डर प्रक्रिया रद्ध गर्दा राज्यलाई भएको घाटा वा फाइदाका बारेमा सरकार मौन रहनुले भ्रष्टाचारको जालो बलियो भएको उनको दाबी छ ।

लिङदेनले मुलुकको राजनीतिमा नेता, कर्मचारी, व्यापारी र विचौलियाको गठजोडले राज्य संयन्त्रलाई वन्धक बनाएको पुरानो आरोप दोहोर्याएका छन् । अदालतलगायतका संवैधानिक निकायहरूमा भइरहेका पछिल्ला घटनाक्रमले आफूहरूको दाबीलाई पुष्टि गरेको उनले जिकिर गरे । वर्तमान सरकार पनि विगतकै बाटो पछ्याउँदै सुधारको सट्टा विवादमा फसेको उनको भनाइ छ ।

उनले भने, ‘हामीले आफ्नो जीवनकालमै ठूला राजनीतिक परिवर्तन देखेका छौँ । तर आज लोकतन्त्र र जनमतकै नाममा मुलुकमा सर्वसत्तावादको खतरा बढ्दै गएको छ । विधि र नियमभन्दा आदेश र लहरका आधारमा राज्य सञ्चालन हुने प्रवृत्तिले लोकतान्त्रिक व्यवस्थामाथि प्रश्न खडा गरेको छ । हालका प्रहरी प्रशासनका अधिकारीहरूको नियुक्ति तथा हटाउने प्रक्रिया, विभिन्न सरकारी अधिकारीहरूको पक्राउ र पुनःस्थापनाजस्ता घटनाले सरकारको कार्यशैलीमाथि प्रश्न उठाएका छन् । राजनीतिक नेतृत्व, कर्मचारीतन्त्र, व्यापारी र विचौलियाबीचको सम्बन्ध तथा राज्यका निकायमा देखिएका विकृतिबारे पनि गम्भीर समीक्षा आवश्यक छ । त्यसैले राष्ट्रिय प्रजातन्त्र पार्टी अब सत्ता र व्यक्तिगत स्वार्थबाट माथि उठेर राष्ट्रिय हितलाई केन्द्रमा राख्दै अघि बढ्नुपर्छ । आगामी महाधिवेशनबाट पार्टीलाई सुधारिएको, परिमार्जित र रूपान्तरित बनाउँदै जनतामाझ नयाँ विश्वासका साथ प्रश्तुत गर्नु आजको आवश्यकता हो ।’

आफ्नो पार्टीभित्रको अवस्थाबारे बोल्दै उहाँले राष्ट्रिय स्वार्थभन्दा माथि उठ्न कार्यकर्तालाई आग्रह गरेका छन् । विगतमा सत्ता र व्यावसायिक स्वार्थका लागि राप्रपाको प्रयोग भएको स्वीकार गर्दै उहाँले अब हुने महाधिवेशनबाट पार्टीलाई ‘सुध्रिएको र परिवर्तित’ बनाएर जनतामा लैजानुपर्ने आवश्यकता औंल्याएका छन् ।