१ भाद्र २०८३, सोमबार
काठमाडौं ।सत्तारुढ दल राष्ट्रिय स्वतन्त्र पार्टी (रास्वपा)का सभापति रवि लामिछानेले पार्टीभित्र कुनै गुट वा समूह नरहेको दाबी गरेका छन् ।
सोमवार चःमतिस्थित पार्टी केन्द्रीय कार्यालयमा ‘क्याण्डिडेट क्लव’ घोषणा गर्नेक्रममा उनले यस्तो दाबी गरेका हुन् । उनले पार्टीको महाधिवेशन सम्पन्न भएसँगै पार्टी समायोजनको सम्पूर्ण काम सकिएको भन्दै गुटबन्दीमा नलाग्न पार्टी कार्यकर्तालाई निर्देशन दिएका छन् । उनले रास्वपामा एउटै पार्टी र एउटै नेतृत्व रहेको दाबी गर्दै फरक–फरक गुटको अस्तित्व रहन नसक्ने बताएका छन् । उनले कसैले आफूलाई कुनै गुट वा नेतासँग जोडेर परिचय दिएपनि त्यसलाई मनोरञ्जनबाहेक अन्य रूपमा लिन नसकिने उनको जिकिर छ ।
उनले भने,‘महाधिवेशनको समाप्ती सँगसँगै पार्टी समायोजनको सम्पूर्ण काम समाप्त भइसकेको छ । हामी एउटा रास्वपा छ, एउटा लिडरसिप छ । अलग अलग छैन । फरक फरक छैन । कसैले म यो गुटको म त्यो गुटको भन्न सक्ला । मेरो नेता यो हो, त्यो हो पनि भन्न सक्ला । त्यसबाहेक मनोरञ्जनबाहेक केही पनि लिन सकिँदैन । यो कुरामा मस्पष्ट गर्न चाहन्छु ।’
सभापति लामिछानेले स्थानीय तह निर्वाचनमा पार्टी संगठन निर्माणमा योगदान दिने उम्मेदवारलाई प्राथमिकता दिइने समेत स्पष्ट पारेका छन् ।
प्रकाशित मिति: १ भाद्र २०८३, सोमबार
