एउटा फूलबारी

सागर फुयाल, काठमाडौं, नेपाल

ओ प्रिय,
मेरो समीप आउँदा
यो “सागर” सँग
कहाँबाट आयो यतिका सुवासहरू भनेर
तिमी नअलमलिनु

नबिर्स प्रिय,
म यात्री थिएँ एउटा फूलबारीको
जहाँ मुस्कुराउँथे
जाही, जुही र गुलाफहरू
अनि बित्थे मेरा दिनहरू
तिन्कै दृश्य, दर्शक र द्रष्टा बनेर

त्यसैले प्रिय,
फैलिएका यी सुवासहरू
तिनै फूलका परागका हुन्
जुन उड्दै उड्दै
छाइदिए मेरो आभाभरि
सद्भाव र प्रेमको कथा बनेर!