भुईँमा अस्ताउनु अघि

✍️सागर फुयाल, बर्लिन, जर्मनी

फैलिएका हातहरू
उत्साहित आँखाहरू
तृषित ओँठहरू
आभा छचल्किएका मुहारहरू

हात फैलाउँदै
पछ्यौरी फिँजाउँदै
आकाशबाट झरेको जून
भुईँमा अस्ताउनु अघि नै
समाउन, सम्हाल्न अनि सङ्गाल्न
दौडिरहेका छन्

केही संशयका
केही अनिश्चयका
सुसुप्त भयहरू बोकेर—
झर्दा झर्दै त्यो
समीपै नआई कतै
हावामै बिलाउने हो कि
आँधी चलेर
त्यसलाई उडाई कतै
अन्तै लैजाने पो हो कि।