२३ बैशाख २०८३, बुधबार
काठमाडौँ । सिंहदरबारमा बुधबार बसेको कृषि समितिको बैठकमा रास्वपाका सांसद सागर ढकालले कृषि क्षेत्रमा देखिएको बाँदर तथा बँदेलको समस्या समाधानका लागि विशेष नीति आवश्यक रहेको बताएका छन् ।
बैठकमा ढकालले खेतीपातीमा बढ्दो क्षति पुर्याइरहेको बाँदर र बँदेलको समस्या दीर्घकालीन रूपमा समाधान गर्न सरकार गम्भीर हुनुपर्ने धारणा राखे । उनले वैज्ञानिक अध्ययन र योजनाबद्ध नीतिमार्फत मात्र यस समस्याको प्रभावकारी समाधान सम्भव हुने बताए ।
ढकालले कृषि क्षेत्रमा देखिएका समग्र समस्याको पहिचान गरी समाधानका उपाय सुझाउन विश्वविद्यालयहरूसँग सहकार्य गर्नुपर्ने आवश्यकता औंल्याउँदै कृषि औद्योगिकीकरणमा समेत ध्यान दिनुपर्ने उल्लेख गरे ।
उनले भने, ‘कृषि क्षेत्रमा देखिएका समस्याहरुको पहिचान गरि समाधानका उपायबारे सिफारिस गर्न विश्वविद्यालयलाई अनुरोध गरौँ । त्यस्तै कृषि औद्योगिकरणमा पनि हामीले फोकस गर्नुपर्छ । बाँदर तथा बँदेलको समस्या समाधानको लागि पनि विशेष नीति लागु गर्नुपर्छ । बाँदर मार्नुपर्छ भनेर हचुवाको तालमा चाँही बोल्नु हुँदैन ।’
उनले अव्यवस्थित प्रतिक्रिया भन्दा पनि अध्ययनमा आधारित नीति निर्माणमार्फत समस्या समाधान गर्न सरकारलाई सुझाव दिएका छन् ।
प्रकाशित मिति: २३ बैशाख २०८३, बुधबार
