२७ फाल्गुन २०८२, बुधबार
काठमाडौँ । प्रतिनिधिसभा सदस्य निर्वाचनअन्तर्गत समानुपातिकतर्फको मतगणना सकिएको छ। निर्वाचन आयोगले सबै जिल्लाबाट प्राप्त निर्वाचन फारम प्रणालीमा प्रविष्ट गर्ने काम गरिरहेको जनाएको छ।
आयोगका सहायक प्रवक्ता कुलबहादुर जिसीका अनुसार अन्तिम विवरण वेबसाइटमा अद्यावधिक भएपछि प्राप्त मतका आधारमा थ्रेसहोल्ड कटाउने दल छुट्याएर सिट बाँडफाँट प्रक्रिया अघि बढाइनेछ।
पछिल्लो विवरणअनुसार १ करोड ७ लाख ३९ हजार ११५ मत गणना भइसकेको छ। जसमा राष्ट्रिय स्वतन्त्र पार्टी (रास्वपा) ५१ लाख ३९ हजार २३५ मतसहित अग्रस्थानमा रहेको छ। यस्तै नेपाली कांग्रेसले १७ लाख ४९ हजार ५८३, (नेकपा (एमाले)ले १४ लाख ४८ हजार ८५४, नेपाल कम्युनिस्ट पार्टीले ८ लाख ५ हजार ७५३, श्रम संस्कृति पार्टीले ३ लाख ७८ हजार ६४९ र राष्ट्रिय प्रजातन्त्र पार्टीले ३ लाख २९ हजार ४७२ मत प्राप्त गरेका छन्।
आयोगले अन्तिम तथ्याङ्क सार्वजनिक गरेपछि समानुपातिक सिट बाँडफाँटको प्रक्रिया टुंगो लाग्ने जनाएको छ।
प्रकाशित मिति: २७ फाल्गुन २०८२, बुधबार
