हामी काम गर्छौं भनेर आएका छौँ, काम नै हाम्रो आवाज होः विना गुरुङ

कास्की। कास्की निर्वाचन क्षेत्र नम्बर ३ वाट राष्ट्रिय स्वतन्त्र पार्टीको तर्फबाट प्रतिनिधि सभा सदस्यमा निर्वाचित विना गुरुङले आफू राजनीतिक लाभका लागि नभई जनताको सेवा गर्न आएको बताउनुभएको छ ।

प्रतिनिधि सभा सदस्य निर्वाचित भएको प्रमाणपत्र लिएपछि उहाँले गाउँबस्तीमा पुग्दा देखिएका आमाबुबाको पीडा र आँशु पुछ्ने जिम्मेवारी आफूले महशुस गरेको बताउनु भयो । उहाँले मतदाताले दिएको निवेदन र समस्यासम्बन्धी पत्रहरू व्यवस्थित रूपमा फाइलिङ गरेर राखेको जानकारी दिनुभयो । ती सबै निवेदनहरुलाई अध्ययन गरेर जनताको आवाजलाई सदनमा उठाउने बताउनु भयो । गुरुङले आफूहरू काम गर्नकै लागि निर्वाचित भएर आएको उल्लेख गर्दै विकास र परिणाममुखी कामलाई प्राथमिकता दिने प्रतिवद्धता जनाउनु भयो ।

उहाँले भन्नुभयो, ‘म कुनै राजनीतिको लाभ लिनुभन्दा पनि कसरी जनताको सेवा गर्न सकिन्छ, गाउँबस्ती डुलिराख्दा देखिएका बुबाआमाको आँशु पुछ्न सकिन्छ, भन्ने हेतुले उपस्थित भएको छु । उहाँहरुले दिनुभएको म्याण्डेट, उहाँहरुले दिनुभएको निवेदनका पत्रहरु सम्पूर्ण मैले फाईलिङ गरेर राखेको छु । फुर्सदको समयमा एक÷एक गरेर हेर्नेछु र उहाँहरुको आवाज मेरो आवाज बन्नेछ र मैले सदनमा उहाँहरुको आवाजलई सम्बोधन गर्नेछु । हामी काम गर्छौं भनेर आएका छौँ, काम काम काम भन्ने नै हाम्रो आवाज रहेको छ । काम गरेर परिणाम दिने प्रतिवद्धता जनाउँछु ।’

मुख्य निर्वाचन अधिकृत हिमलाल बेल्वासेले गुरुङलाई प्रतिनिधि सभा सदस्यमा निर्वाचित भएको प्रमाणपत्र प्रदान गर्नुभएको थियो । कास्की क्षेत्र नम्बर ३ मा गुरुङ ३७ हजार ७५० मत ल्याएर विजयी हुनुभएको हो । उहाँको निकटतम प्रतिस्पर्धी नेपाली काँग्रेसका मनोज गुरुङले १२ हजार ७८० मत ल्याउनु भयो । नेकपा एमालेका उम्मेदवार दमोदर बैरागीले ७ हजार ९०६, नेपाली कम्युनिष्ट पार्टीका गोपाल गिरीले १ हजार ४५६ र राष्ट्रिय प्रजातन्त्र पार्टीका अर्जुन खनालले १ हजार ४०६ मत ल्याउनु भयो । कास्की क्षेत्र नम्बर ३ मा ६५ हजार ४ सय ७ मत खसेको थियो ।