२३ फाल्गुन २०८२, शनिबार
काठमाडौँ। झापा–५ बाट प्रतिनिधि सभा निर्वाचनको मतगणना पूर्ण भएको छ। राष्ट्रिय स्वतन्त्र पार्टी (रास्वपा) का बालेन्द्र (बालेन) शाहले पूर्वप्रधानमन्त्री केपी शर्मा ओलीलाई करिब ५० हजार मतले पराजित गर्दै ऐतिहासिक विजय प्राप्त गरेका छन् ।
बालेनले ६८,३४८ मत प्राप्त गर्दा ओली सीमित १८,७३४ मतमा रोकिए। मतान्तर करिब ४९,६१४ पुगेको छ। तेस्रो स्थान श्रम संस्कृति पार्टीका समिर तामाङले ९,२३३ मतसहित ओगटेका छन् भने नेपाली कांग्रेसकी मंधरा चिमरिया चौथो स्थानमा १,८२१ मतसहित सीमित रहिन्।
झापा–५ क्षेत्रबाट पटक–पटक निर्वाचित हुँदै आएका ओली यसपटक पहिलोपटक बालेनसँग प्रत्यक्ष भिडन्तमा पराजित भए। बालेन भने पहिलोपटक संसदीय निर्वाचनमा उम्मेदवारी दिएका थिए र रास्वपाले उनलाई भावी प्रधानमन्त्रीका रूपमा अघि सारेको थियो।
यसअघि काठमाडौँ महानगरपालिकाका मेयर रहेका बालेनले संसदीय यात्राको तयारीका लागि मेयर पदबाट राजीनामा दिएका थिए।
प्रकाशित मिति: २३ फाल्गुन २०८२, शनिबार
