२४ कार्तिक २०८२, सोमबार
काठमाडौं। नेपाल प्रहरीका नयाँ महानिरीक्षकमा एआईजी दानबहादुर कार्की नियुक्त भएका छन्।
सोमबार बसेको मन्त्रिपरिषद् बैठकले कार्कीलाई आईजीपीमा नियुक्त गरेको सञ्चारमन्त्री जगदीश खरेलले जानकारी दिए। ३० वर्षे सेवा अवधि पूरा हुने भएकाले वर्तमान आईजीपी चन्द्रकुवेर खापुङ २६ कात्तिक राति १२ बजेबाट अवकाशमा जान लागेका छन्। त्यसअघि नै सरकारले कार्कीलाई नयाँ प्रहरी प्रमुख बनाएको हो।
कार्की हाल काठमाडौं उपत्यका प्रहरी कार्यालय, रानीपोखरीमा कार्यरत थिए। जेनजी आन्दोलनका बेला उनले उपत्यकाको कमाण्ड सम्हालेका थिए। इमानदार र अनुशासित प्रहरी अधिकृतका रूपमा चिनिएका कार्कीले काठमाडौं, लुम्बिनीदेखि मानव स्रोत विभाग र आईजीपी सचिवालयसम्मको अनुभव सँगालेका छन्।
कुनै ठूलो आर्थिक विवादमा नमुछिएका उनी नेपाल प्रहरीका केन्द्रीय प्रवक्ता पनि रहिसकेका छन्।
प्रकाशित मिति: २४ कार्तिक २०८२, सोमबार
