१५ आश्विन २०८२, बुधबार
काठमाडौं । दशैं नेपालीहरूको महान चाड मात्र नभई परिवार, संस्कृति र एकतासँग जोडिएको पर्व पनि हो । तर चाडपर्वमा हुने असन्तुलित खर्च, खानपान र जीवनशैलीले स्वास्थ्यदेखि सामाजिक सम्बन्धमा समेत नकारात्मक असर पार्न सक्ने विशेषज्ञहरूको चेतावनी छ ।
स्वास्थ्य मन्त्रालयका प्रवक्ता डा. प्रकाश बुढाथोकीका अनुसार, दशैंको रमाइलो हर्षोल्लास बीच खानपानमा असावधानी हुँदा दीर्घरोगीदेखि सामान्य व्यक्तिसम्मलाई १६० भन्दा बढी रोगको जोखिम रहन्छ । उनले विशेषगरी काँचो मासु, भुटेको मासु, सेकुवा, छोइला तथा जंकफुडजस्ता परिकारले पाचन प्रणालीमा समस्या ल्याउने मात्र नभई दीर्घकालीन रूपमा क्यान्सर जस्ता गम्भीर रोग निम्त्याउन सक्ने बताएका छन् ।
दशैंलाई सही तरिकाले मनाउने ५ उपाय :
सन्तुलित खानपान : मासु झोलिलो बनाएर, हरियो सागसागै खाँदा स्वास्थ्यमा लाभ हुन्छ ।
मितव्ययी खर्च : देखावटीभन्दा परिवारसँगको समयलाई प्राथमिकता दिनु उपयुक्त हुन्छ ।
व्यायाम र नियमितता : दशैंमा पनि बिहानको मर्निङ वाक वा हल्का व्यायाम निरन्तरता दिनुपर्छ ।
सकारात्मक भेटघाट : रिसरागभन्दा टाढा रहँदै आफन्त, साथीभाइसँग सद्भावपूर्ण भेटघाट गर्नु चाडपर्वको सार हो ।
धार्मिक आस्था र परम्परा : दशैं केवल मासु र रमाइलो मात्र होइन, देवीप्रति श्रद्धा, परिवारप्रति जिम्मेवारी र संस्कृतिको जगेर्नासमेत हो ।
डा. बुढाथोकीले दीर्घरोगीलाई आफ्नो नियमित औषधि पहिले नै तयारी अवस्थामा राख्न सुझाव दिएका छन् । साथै, सेतो मासु (कुखुरा, माछा) प्रयोग गर्ने बानीले स्वास्थ्यलाई तुलनात्मक रूपमा सुरक्षित बनाउने उनको भनाइ छ ।
प्रकाशित मिति: १५ आश्विन २०८२, बुधबार
