२३ भाद्र २०८२, सोमबार
काठमाडौँ। महान्यायाधिवक्ता रमेश वडालले सर्वोच्च अदालतको गलत फैसलाका कारण राष्ट्रपति र उपराष्ट्रपति दुवै पदमा महिला अधिकार खोसिएको टिप्पणी गरेका छन् ।
महिला सरकारी वकिलहरूको प्रथम राष्ट्रिय सम्मेलनलाई सोमवार काठमाडौंमा सम्बोधन गर्दै वडालले यस्तो टिप्पणी गरेका हुन् । सर्वोच्चको गलत व्याख्याका कारण राष्ट्रपति र उपराष्ट्रपतिमा दुवै पदमा पुरुष पुगेको उनको भनाइ छ । उनले मुलुकको सर्वोच्च दुवै पदमा पुरुष नियुक्त गर्न पाउने सर्वोच्चको व्याख्याका कारण महिलाको प्रतिनिधित्वको संवैधानिक अधिकार खोसिएको टिप्पणी गरेका छन् । उनले राज्य अन्य सबै निकायहरुमा दुई जनामध्ये एक जना महिला रहेको उल्लेख गर्दै राष्ट्रिय सभाको अध्यक्ष र उपाध्यक्ष, प्रतिनिधि सभाको सभामुख वा उपसभामुख तथा प्रदेश सभाको प्रमुख र उपप्रमुखमध्ये एक जना महिला रहेको उदाहरण दिएका छन् ।
उनले भने, ‘सर्वोच्च अदालतले गरेको एउटा गलत फैसलाको कारणले राष्ट्रपति र उपराष्ट्रपति दुवै पुरुष हुन पुग्नुभएको छ । त्यो कुरालाई अपवाद मान्ने हो भने राष्ट्रिय सभाको अध्यक्ष र उपाध्यक्षमध्ये एकजना महिला हुनु भएको छ । प्रतिनिधि सभाको सभामुख र उपुसभामुखमध्ये एक जना महिला हुनु भएको छ । प्रदेश सभाको प्रमुख र उपप्रमुखमध्ये पनि एक जना अनिवार्य रुपमा महिला हुनु भएको छ । तर दुर्भाग्य राष्ट्रपति र उपराष्ट्रपतिमा दुवै जना पुरुष हुने व्याख्या हाम्रो सर्वोच्च अदालतबाट भयो । जसको कारणले गर्दा त्यहाँ महिला अधिकार खोसिन पुगेको छ भन्ने मेरो बुझाई छ ।’
सम्पतीको हकअनुसार घर जग्गा महिलाको नाममा दर्ता हुने प्रक्रिया बढ्दै गरेको उल्लेख गर्दै उनले यो सकारात्मक भएको बताएका छन् ।
प्रकाशित मिति: २३ भाद्र २०८२, सोमबार
