१५ भाद्र २०८२, आईतवार
काठमाडौँ। प्रधानमन्त्री केपी शर्मा ओलीले बेल्ट एण्ड रोड इनिसिएटिभको कार्यान्वयन अघि बढाउन चीनसँग आग्रह गरेका छन् ।
चीन भ्रमणमा रहेका प्रधानमन्त्री ओलीले शनिवार साँझ चिनियाँ राष्ट्रपति शि चिनफिङसँगको भेटवार्ताका क्रममा यस्तो आग्रह गरेका हुन् ।
प्रधानमन्त्रीको भनाइ उद्धृत गर्दै प्रधानमन्त्रीका आर्थिक सल्लाहकार डा. युवराज खतिवडाले नेपालको विकासमा चिनियाँ सहयोग महत्वपूर्ण रहेको बताउँदै अहिले चीनसँगका अवरुद्ध नाकाहरु सञ्चालन गर्न पहल गरिदिन पनि आग्रह गरेको बताए । जवाफमा चिनियाँ राष्ट्रपति शि चिनफिङले नेपाललाई भूपरिवेष्ठितबाट जमिनको माध्यमले ठूला बजारमा पहुँच विस्तार गर्ने देशको रुपमा विकसित भएको हेर्न चाहेको उल्लेख गरे । व्यापारिक नाकाहरु खोलेर सुचारु गराउने कुरामा थप प्रतिवद्धता जनाउनुभएको पनि खतिवडाले बताए । चीनमा नेपालको तर्फबाट ठूलो मात्रामा निर्यात बढाउन गुणस्तरीय कृषियोग्य वस्तुहरु, नेपालमा औद्योगिक विकास गर्नका लागि चीनको सहयोग रहनेमा विश्वस्त बनाएको बताएका छन् ।
उनले भने, ‘नेपालका सम्माननीय प्रधानमन्त्रीज्युले चिनियाँ सहयोगले नेपालको विकासमा जुन योगदान गरेको छ, त्यसको म प्रशंसा गर्दछु, अहिले जुन नाकाहरु अवरोध भएका छन्, व्यापारिक नाकाहरु ति नाकाहरु छिटो खोल्नका लागि चिनियाँ सहयोगको अपेक्षा गर्दछु भन्नुभएको छ । बेल्ट एण्ड रोड इनिसिएटिभको कार्यान्वयनलाई हामीले अघि बढाउनुपर्छ भन्नेकुरा राख्नुभएको छ । चिनियाँ राष्ट्रपतिले त्यसलाई सम्बोधन गर्दै हामी नेपाललाई भूपरिवेष्ठितबाट जमिनको माध्यमबाट ठूला बजारहरुमा आवद्ध हुने देशको रुपमा विकास भएको हेर्न चाहन्छौँ भन्नुभएको छ । व्यापारिक नाकाहरु खोलेर सुचारु गराउने कुरामा थप प्रतिवद्धता जाहेर गर्नुभएको छ । चीनमा नेपालको तर्फबाट अलि ठूलो मात्रामा निर्यात बढाउन गुणस्तरीय कृषियोग्य वस्तुहरुको कुरा, नेपालमा औद्योगिक विकास गर्नका लागि चीनको सहयोग रहनेछ भन्नुभएको छ । अहिलेको एआई प्रविधि र सूचना प्रविधिमा चीनले सहयोग गर्दछ भन्नुभएको छ । सीमा व्यापारको सम्बन्धमा कुरा उठ्दा उहाँले अहिलेको अवरोध हटाउन चीन तयार छ भन्नेकुरा राख्नुभएको छ । बहुपक्षिय रुपमा हाम्रो अन्तर्राष्ट्रिय सम्बन्ध अघि बढाउने कुरामा नेपालको सहयोग रहनेछ भनिरहँदा नेपाल र चीनबीचको आर्थिक सम्बन्ध संस्थागत रुपमा अघि बढाउन संयन्त्र बनाएर अघि बढ्नुपर्ने भन्नुभएको छ।’
आर्थिक सल्लाहकार खतिवडाकाअनुसार अहिलेको एआई प्रविधि र सूचना प्रविधिमा चीनले सहयोग गर्ने, सीमा व्यापारको सम्बन्धमा कुरा उठ्दा अहिलेको अवरोध हटाउन चीन तयार रहेको बताउनुभएको पनि जानकारी दिएका छन् । बहुपक्षिय रुपमा अन्तर्राष्ट्रिय सम्बन्ध अघि बढाउने कुरामा नेपालको सहयोग रहने र नेपाल र चीनबीचको आर्थिक सम्बन्ध संस्थागत रुपमा अघि बढाउन संयन्त्र बनाएर अघि बढ्नुपर्ने कुरामा जोड दिनुभएको उल्लेख गरेका छन् ।
प्रकाशित मिति: १५ भाद्र २०८२, आईतवार
