३ भाद्र २०८२, मंगलवार
काठमाडौँ। नेकपा (माओवादी केन्द्र)का सांसद सुरेशकुमार आलेमगरले सरकारले राज्यका सबै संयन्त्रहरु कब्जा गरेर राज्य आतंक मच्चाउने प्रयास गरेको आरोप लगाएका छन् ।
राष्ट्रिय सभाको मंगलवारको बैठकमा बोल्दै उनले सरकारले संवैधानिक निकायदेखि न्यायालयसम्म नियन्त्रण गर्ने प्रयास गरेको आभास भइरहेको टिप्पणी गरेका छन् । उनले संवैधानिक पदाधिकारी नियुक्तिसम्बन्धी मुद्दामा सर्वोच्च अदालतको फैसलामा प्रधानन्यायाधीश समेत अल्पमतमा पर्ने अवस्था आउनु न्याय सम्पादन प्रक्रियाकै मजाक भएको टिप्पणी गरेका छन् । उहनले पुरुषलाई बहुविवाह गर्न दिने अधिकारसम्बन्धी कानूनी मस्यौदाको समेत विरोध गर्दै उक्त प्रस्तावलाई अस्वीकार्य करार गरेका छन् ।
उनले भने, ‘झन्डै दुई तिहाईको सरकारले राज्यका सबै संयन्त्रमाथि कब्जा जमाएर राज्य आतंक मच्चाउन खोजेको हामीलाई आभास भएको छ । केही समय अगाडि संवैधानिक निकायका पदाधिकारीहरुको सम्बन्धमा परेको एउटा मुद्दामा सर्वोच्च अदालतका सम्माननीय प्रधानन्यायाधीशज्यु समेत अल्पमतमा रहनेगरी एउटा फैसला आएको थियो । र न्याय सम्पादन कार्यमा एउटा मजाको स्थिति सिर्जना भएको थियो । त्यसैगरी पुरुषहरुलाई बहुविवाह गर्न पाउने अधिकारको कानूनी मस्यौदाको कुरा पनि अगाडि आएको थियो । जसलाई हामी सबैले विरोध गर्यौं र यतिबेला ओझेलमा परेको छ । फेरि प्रतिनिधि सभाका सम्माननीय उपसभामुखज्यूलाई महाअभियोग लगाएर हटाउने भन्ने दुष्प्रयास भइरहेको छ भन्ने हामीले सुनेका छौं । यदि त्यस्तो भयो भने ठूलो बिडम्वना हुनेछ । यी सबै राज्य आतंक फैल्याउने कार्य बन्द गरियोस् ।’
सांसद आलेमगरले प्रतिनिधि सभाकी उपसभामुखलाई महाअभियोग लगाउने प्रयास भइरहेको सुनेको भन्दै त्यस्तो नगर्न चेतावनी दिंदै उनले राज्य आतंक फैलाउने कार्य तत्काल बन्द गर्न सरकारलाई चेतावनी दिएका छन्।
प्रकाशित मिति: ३ भाद्र २०८२, मंगलवार
