१९ श्रावण २०८२, सोमबार
काठमाडौँ । खोटाङको हलेसी दर्शन सकेर फर्कँदै गरेको एक माइक्रोबस सोमबार बिहान दुर्घटनामा पर्दा एक जनाको ज्यान गएको छ भने १४ जना घाइते भएका छन्।
दुर्घटना मध्य पहाडी लोकमार्गको जयरामघाट–हलेसी सडक खण्ड अन्तर्गत कदुवा स्थित डौँठेखोला नजिकै भएको हो। मधेस प्रदेशको सिराहातर्फ जाँदै गरेको प्रदेश २-०-१-००१ ज ००५३ नम्बरको माइक्रोबस सडकबाट झण्डै २ सय मिटर तल खस्दा दुर्घटनाग्रस्त बनेको हो।
दुर्घटनामा मृत्यु हुने र घाइतेहरूको परिचय खुल्न बाँकी रहेको खोटाङ प्रहरीले जनाएको छ। माइक्रोमा १६ जना सवारमध्ये २ जना सामान्य घाइते र बाँकी सबै घाइते भएका छन्।
प्रहरीको जयरामघाट चौकी, हलेसी इलाका प्रहरी र जिल्ला प्रहरी कार्यालयको संयुक्त टोलीले उद्धार गरी घाइतेलाई उपचारका लागि अस्पताल पठाएको छ।
प्रत्यक्षदर्शीका अनुसार दुर्घटनाग्रस्त माइक्रोबस अझै घटनास्थलमै अड्किएको छ। बुट्यान र झाडी भएका कारण सवारीसाधनको गति केही रोकिएको र यात्रुहरूमा थप ठूलो क्षति हुनबाट जोगिएको अनुमान गरिएको छ।
सिराहा, सर्लाही तथा केही भारतीय नागरिकसमेत यात्रु हुनसक्ने प्रहरीको प्रारम्भिक आकलन छ। यात्रुहरूको स्थायी ठेगाना र थप विवरण संकलनको काम भइरहेको प्रहरीले जनाएको छ।
प्रकाशित मिति: १९ श्रावण २०८२, सोमबार
