११ श्रावण २०८२, आईतवार
काठमाडौँ। नेकपा (एकीकृत समाजवादी) का सांसद शेरबहादुर कुँवरले दलित, भूमिहीनहरुको नाम देखाएर जग्गा अरुलाई बाँड्ने काम गर्न नहुने बताएका छन् ।
आईतवार सिंहदरबारमा बसेको कृषि, सहकारी तथा प्राकृतिक श्रोत समितिको बैठकमा बोल्दै उनले यस्तो बताएका हुन् । समितिमा आईतवार भूमि सम्बन्धी केही नेपाल ऐनलाई संशोधन गर्न बनेको विधेयक, २०८२ मा परेका संशोधनका सम्बन्धमा संशोधनकर्ताहरुसँग छलफल भएको हो । छलफलका क्रममा बोल्दै उनले राम्रो उद्देश्यका साथ विधेयक आएको भए किन बाँगोटिंगो गरिरहेको भन्दै प्रश्न गरे । उनले भूमि ऐन संशोधन गर्नेगरी विधेयक आउँदा चर्चा हुने गरेको बताए ।
उनले भने,‘राम्रै मन, राम्रै सोच, राम्रै उद्देश्यका साथ यो विधेयक आएको हो भने यसरी बाँगो टिंगो गर्न के आवश्यक छ र । यदी होइन भने किन यस्तो गरियो । पटक पटक जब भूमि ऐन संशोधन गर्नेगरी विधेयक आउँछ, चर्चा परिचर्चा हुन्छ । सुकुम्बासी र दलितको नाम लिइएको छ, ज्यादै राम्रो कुरा, किनभने अझै पनि नेपालमा सुकुम्बासीहरु छन्, जसको एउटा घर बनाउने जग्गा छैन । दलितहरु गाउँमा जग्गाविहीन छन् उनीहरुलाई जग्गा दिनेकुरा राम्रो हो । उनीहरुको नाम देखाउने तर विधेयकमा अर्कैकुरा आउँदा सबैको चासो भएको छ ।’
सांसद कुँवरले विधेयकमा महत्वपूर्ण कुरा हुँदाहुँदै पनि केही विषयवस्तुहरुले विधेयकलाई चर्चाको विषय बनाएको बताए ।
प्रकाशित मिति: ११ श्रावण २०८२, आईतवार
