११ श्रावण २०८२, आईतवार
एजेन्सी। इरान र युरोपेली ३ देशहरू(फ्रान्स, बेलायत र जर्मनी)का कुटनीतिज्ञहरूले इस्तानबुलमा प्रतिवन्ध राहत र आणविक मुद्दाको बारेमा छलफलपछि परामर्श जारी राख्न सहमत भएका छन् ।
इरानी कानूनी तथा अन्तर्राष्ट्रिय मामिला उप–विदेशमन्त्री काजेम घरिबादीले यसबारे जानकारी गराएका हुन् । इरानी प्रतिनिधिमण्डलको नेतृत्व राजनीतिक मामिला उप–विदेशमन्त्री माजिद तख्त–रावन्ची र घरिबादीले गरेका थिए । लगभग चार घण्टा चलेको बैठकपछि घरिबादीले इरान र युरोपेली त्रिपक्षीयले आणविक मुद्दा र प्रतिवन्ध हटाउने सम्बन्धमा गम्भीर, स्पष्ट र विस्तृत छलफल गरेको बताए । इरानी पक्षले इजरायलसँगको हालैको द्वन्द्वको बारेमा युरोपेली अडानहरूको कडा आलोचना गरेको छ ।
स्न्यापब्याक संयन्त्रसहित आफ्नो सैद्धान्तिक अडान दोहोर्याएको छ । स्न्यापब्याक संयन्त्र २०१५ को आणविक सम्झौताको एउटा धारा हो । जसलाई औपचारिक रूपमा संयुक्त व्यापक कार्य योजना भनेर चिनिन्छ । जसले इरानले सम्झौताको पालना गर्न असफल भएमा अन्य पक्षहरूलाई सबै अन्तर्राष्ट्रिय प्रतिवन्धहरू पुनः लागू गर्न अनुमति दिनेछ । जुन १३ मा इरानमा इजरायली आक्रमण पछि अमेरिका–इरान वार्ता र युरोपेली पक्षहरूसँगको व्यापक छलफल निलम्वित भएपछि इरानी आणविक मुद्दामा कुटनीति पुनः शुरु गर्ने प्रयासहरूको बीचमा वार्ता भएको हो ।
प्रकाशित मिति: ११ श्रावण २०८२, आईतवार
