टर्कीमा डढेलोको जोखिम

एजेन्सी। टर्कीका कृषि तथा वनमन्त्री इब्राहिम युमाक्लीले देशभर तापक्रम बढ्दै जाँदा डढेलोको खतरा बढ्ने चेतावनी दिएका छन् । आगामी दिनहरूमा गर्मी र तिब्र हावाका कारण जोखिम बढ्ने बताएका हुन् । केही समय यता देशमा डढेलो लागिरहेको छ ।

अर्ध–सरकारी अनादोलु एजेन्सीले रिपोर्ट गरेको छ कि बुधवार साकारिया, अन्टाल्या, एस्कीसेहिर, बिलेसिक र डेनिजली प्रान्तहरूमा आगो निभाउन अग्निनियन्त्रक टोलीहरूले काम गरिरहेका छन् । टर्कीका मन्त्रीले इज्मिर प्रान्तको उर्ला जिल्लामा लागेको डढेलो नियन्त्रणमा आएको पुष्टि गरे ।

प्रभावित क्षेत्रहरूमा हेलिकप्टर, विमान र दमकल ट्रकहरूसहित हवाई र जमिन एकाइहरू तैनाथ गरिएको बताए । युमाक्लीले टर्कीमा वर्षको शुरुवातदेखि नै लागेको आगलागीको संख्या ४ हजार नाघेको औंल्याए । अक्टोबर १५ सम्म देश आगलागीको जोखिममा रहने बताए ।