अन्तरस्कुल क्रिकेट प्रतियोगिता हुने

काठमाडौँ। क्वालिटी काठमाडौं स्कुल्स (क्युकेएस) को आयोजनामा आगामी नोभेम्बरमा अन्तरस्कुल क्रिकेट प्रतियोगिता हुने भएको छ ।

काठमाडौंमा मंगलवार पत्रकार सम्मेलनमार्फत आयोजकले प्रतियोगिताको बारेमा जानकारी दिएको हो । क्युकेएस अन्तर स्कुल क्रिकेट प्रतियोगिताको पहिलो संस्करण आगामी नोभेम्बर २० मा धुम्बाराही क्रिकेट मैदानमा हुने आयोजकले जनाएको छ । खेलहरू १० ओभरका हुनेछन् । क्युकेएसको छातामुनि रहेका २५ स्कुलमध्ये १६ टोलीले प्रतियोगितामा सहभागिता जनाउने आयोजकको अपेक्षा छ ।

प्रतियोगिताका सहभागीले आफ्नो स्कुलमा अध्ययनरत छात्र तथा छात्रा दुवैलाई पनि टिममा समावेश गर्न पाउने व्यवस्था राखिएको आयोजकले जानकारी गरायो । यो प्रतियोगिता लिगकम नकआउट प्रणालीमा हुनेछ । प्रतियोगिताको विजेता र उपविजेतासँगै सर्वोत्कृष्ट खेलाडी, उदीयमान खेलाडी, सर्वोत्कृष्ट बलर र सर्वोत्कृष्ट ब्याटरले पुरस्कार पाउनेछन् ।