६ श्रावण २०८२, मंगलवार
एजेन्सी। जापानको सत्तारुढ लिबरल डेमोक्रेटिक पार्टीको नेतृत्वमा रहेको गठबन्धनले माथिल्लो सभामा आफ्नो बहुमत गुमाउने निश्चित भएको रिपोर्ट गरेको छ । गठबन्धनले संसदको २ सय ४८ सिट भएको माथिल्लो सदनमा बहुमतका लागि आवश्यक १२५ सिटहरू आवश्यक पर्छ ।
काउन्सिलरहरूको सभा २४८ सदस्यहरू मिलेर बनेको छ । जसमा निश्चित ६ वर्षको कार्यकाल हुन्छ । प्रत्येक तीन वर्षमा चुनाव हुन्छ । जसमा आधा सिट प्रत्येक पटक चुनावको लागि हुन्छ । आईतवारको मतदानमा रिक्त स्थान भर्नको लागि कुल १२५ सिटहरू जित्ने अपेक्षा गरिएको थियो । यसैबीच, मुख्य विपक्षी संवैधानिक लोकतान्त्रिक पार्टी अफ जापानले आफ्नो सिट गणना विस्तार गर्ने अपेक्षा गरिएको छ । जबकि डेमोक्रेटिक पार्टी फर द पिपुल र सान्सेइटोले उल्लेखनीय लाभ उठाउने देखिन्छ ।
पराजयको बाबजुद पनि शिगेरु इशिबाले जापानको प्रधानमन्त्रीको रूपमा रहिरहने आफ्नो मनशाय व्यक्त गरेका छन् । अक्टोबर २०२४ को आम चुनावमा, सत्तारुढ गठबन्धनले पहिले नै शक्तिशाली प्रतिनिधि सभा वा तल्लो सदनमा आफ्नो बहुमत गुमाएको थियो । जसले गर्दा इशिबा तीन दशकभन्दा बढी समयपछि जापानको पहिलो अल्पसंख्यक सरकार गठन गर्न बाध्य भएका थिए ।
प्रकाशित मिति: ६ श्रावण २०८२, मंगलवार
