६ असार २०८२, शुक्रबार
काठमाडौँ। नेपाल कम्युनिष्ट पार्टी (एकीकृत समाजवादी) का महासचिव घनश्याम भुसालले सिष्टममा समस्या भएका कारण एकपछि अर्को नराम्रा कामहरु भइरहेको बताएका छन् ।
शुक्रवार जनसंगीत मञ्च नेपालको केन्द्रिय कमिटी बैठक एवं प्रशिक्षण कार्यक्रमलाई सम्बोधन गर्दै महासचिव भुसालले यस्तो बताएका हुन् । उनले सिष्टम र व्यवस्थाको समस्या एकै ठाउँमा राखेर हेर्ने हो भने रोजगारी र सुशासन नहुँदा समस्या सिर्जना भएको दाबी गरे । रोजगारीको समस्या केही कार्यालयहरुमा करारमा भर्ती गरिदिएर अथवा कुनै नेताले अलिकति प्रभाव जमाएर जागिर लगाइदिँदैमा समाधान नहुने भन्दै महासचिव भुसालले कृषि, उद्योग र पर्यटन क्षेत्रमा रोजगारी सिर्जना गर्नेतर्फ सरकारले ध्यान दिनुपर्नेमा जोड दिए । उनले प्राकृतिक प्रकोपसँगै विकल्प र व्यवस्था नहुँदा नेपालको पर्यटकीय क्षेत्र धराशायी बनेको र कृषिले दैनिक आवश्यकता पूर्ति गर्नसक्ने अवस्थामा नहुँदा विभिन्न किसिमका काण्डहरु हुने गरेको दाबी गरे ।
उनले भने, ‘लगातार एउटा पछि दुईटा काण्ड भएपछि सकिनु नि त्यो हुँदैन । भनेको हाम्रो सिष्टममै समस्या छ । यसर्थ हामीले अहिलेको सिष्टमका समस्यालाई, अहिलेको व्यवस्थाका समस्या सबैलाई एक ठाउँमा राख्दाखेरि त्यसलाई के नामले भन्न सकिँदोरहेछ भन्दा रोजगारी र सुशासन नहुँदा आजका सबै समस्या सिर्जना भएका हुन् । रोजगारी भन्नेवित्तिकै मानिसले के सोच्छ भने गएर कसैलाई अफिसमा गएर जागिर दिने जस्तो आमरुपमा मानिसले बुझ्छ । गएर स्कूलमा कसैलाई जागिर लगाइदिनु, कति पढेको भनेर सोध्नु अनि डिप्लोमा पढेको हो भनेपछि मास्टरमा लगाइदिनु, कति पढ्यौं मास्टर गरिसकेको छु भनेपछि क्याम्पसमा लगाइदिनुजस्तो कुरा सोच्छन् । कुरा त्यसोमात्र होइन, त्यसरी समस्या समाधान हुँदैन । मुलुकको रोजगारीको समस्या कार्यालयहरुमा करारमा भर्ती गरिदिएर केही नेताले अलिकति प्रभाव जमाएर स्कूल क्याम्पसहरुमा, कार्यालयमा केही मान्छेलाई जागिर लगाइदिएर यो समस्या समाधान हुँदैन । बरु आजको बेरोजगारीको कारण के छ भन्दाखेरि कृषि कृषिजस्तो छैन, कृषि गरेर मानिसहरुले आफ्नो जीवन बाँच्नसक्ने, खानसक्ने र लाउनसक्ने, बच्चाबच्ची पढाउनसक्ने, औषधिउपचार गर्नसक्ने र अरु आवश्यकताका चीजहरु पूरा गर्नसक्ने अवस्थामा कृषि छैन । उद्योगको त एक हिसावले उद्योगै छैन भन्दापनि हुन्छ, राष्ट्रिय अर्थतन्त्रमा जम्माजम्मी पाँच प्रतिशत जतिमात्र उद्योगको योगदान छ । जम्मा पाँच प्रतिशत योगदान भन्नुको अर्थ छैन बराबर जस्तो अवस्थामा छ । कृषिमा पनि रोजगारी छैन, उद्योगमा पनि रोजगारी छैन, पर्यटनको हालतपनि उस्तै हो । न बाटो छ, न प्लेन छ, न त्यसको विकल्प र व्यवस्था छ । उदाहरणका लागि जुरे पहिरोपछि चिनिया पर्यटक नेपाल भित्र्याउन सकिएको छैन । उता भारतीय पर्यटक अलिअलि आउन थालेका थिए त्यो पनि पोहोर सालको बाढीपछि त्यो पनि उठ्न सकेको छैन । भन्नुको अर्थ पर्यटन, कृषि र उद्योगमा रोजगारी छैन भनेपछि रोजगारी छँदैछैन ।’
उनले राष्ट्रिय अर्थतन्त्रमा जम्माजम्मी पाँच प्रतिशतमात्र उद्योगको योगदान रहनु भनेको नभए बराबरको अवस्थामा रहेको टिप्पणी गरे ।
प्रकाशित मिति: ६ असार २०८२, शुक्रबार
