१९ जेष्ठ २०८२, सोमबार
काठमाडौँ। प्यालेस्टिनी स्रोतहरूकाअनुसार दक्षिण गाजामा मानवीय सहायता केन्द्र नजिकै इजरायली आक्रमणबाट आईतवार कम्तिमा ३१ जना प्यालेस्टिनीको मृत्यु भएको छ । गाजामा आधारित स्वास्थ्य प्राधिकरणले दक्षिण गाजाको रफाहमा मानवीय सहायता वितरण बिन्दु नजिकै बिहान इजरायली सेनाले आक्रमण गर्दा कम्तिमा ३१ जनाको मृत्यु भएको र दर्जनौं गम्भीर घाइते भएको बताएको छ ।
गाजामा रहेको स्वास्थ्य प्राधिकरणले एक विज्ञप्तिमा भनेको छ कि धेरैजसो चोटपटक शरीरको माथिल्लो भागमा लागेको छ । घाउको गम्भीरताका कारण मृत्यु हुनेको संख्या बढ्न सक्छ । गाजामा रहेको चिकित्सा राहत संगठनका निर्देशक मोहम्मद अबु अफाशले इजरायली सैन्य गतिविधिका कारण एम्बुलेन्सहरू घटनास्थलमा पुग्न कठिनाइ भइरहेको बताए ।
यस घटनालाई इजरायलले सहायता वितरण स्थलहरूलाई बारम्बार लक्षित गर्ने ढाँचाको अंश भन्दै हमासद्वारा सञ्चालित गाजा सरकारी मिडिया कार्यालयले एक प्रेस विज्ञप्तिमा उक्त क्षेत्र अमेरिकी इजरायली कम्पनीसँगको समन्वयमा र इजरायली सेनाको निगरानीमा सञ्चालन भइरहेको बताएको छ । हमाससँग दुई महिनाको युद्धविराम पछि इजरायलले मार्च १८ मा गाजामा आफ्नो आक्रमण पुनः शुरु गरेको थियो । त्यसबेलादेखि ४ हजार १ सय ४९ प्यालेस्टिनीहरू मारिएका छन् । १२ हजार १ सय ४९ घाइते भएका छन् ।
प्रकाशित मिति: १९ जेष्ठ २०८२, सोमबार
