२२ बैशाख २०८२, सोमबार
काठमाडौँ। राष्ट्रिय प्रजातन्त्र पार्टी (राप्रपा)का उपाध्यक्ष बुद्धिमान तामाङले सरकारले अघि सारेको नीति तथा कार्यक्रमप्रति आपत्ति जनाएका छन् ।
प्रतिनिधि सभाको सोमवारको बैठकमा अगामी आर्थिक वर्षको नीति तथा कार्यक्रममाथि बोल्दै उपाध्यक्ष तामाङले सरकारको नीति तथा कार्यक्रमप्रति आपत्ति जनाएका हुन् । सरकारले अगामी आर्थिक वर्षमा वर्तमान व्यवस्थाविरुद्ध हुने गतिविधिको प्रतिवाद गर्ने नीति लिएको राष्ट्रपति रामचन्द्र पौडेलले जानकारी गराएको प्रती उपाध्यक्ष तामाङले जनमतद्वारा हरेक व्यवस्थाको विकल्प खोज्न सकिने संवैधानिक व्यवस्था रहेको उल्लेख गर्दै सरकारको उक्त नीति संविधान विरोधी भएको टिप्पणी गरेका छन् । उनले सरकारले नीति र कार्यपत्रमार्फत नै फरक विचार भएका पार्टीहरुलाई दुःख दिने काम गर्न खोजेको भन्दै उनले त्यसो गर्न खोजिए प्रतिवादमा उत्रिने चेतावनी दिएका छन् । फरक विचार भएकै कारण आफ्ना विचारहरुलाई सम्मान नगरिए युद्धको थालनी गर्ने उनको चेतवनी छ ।
उनले भने, ‘अराजकताको लागि मात्रै लेखिएको नीति तथा कार्यक्रममा लेखिएको हो भने त गर्नेपर्छ । यदि त्यसबाहेक हो भने यो संविधानको खिलाप हो । जनमतद्धारा हरेक व्यवस्थाको विकल्प राखिएको छ । नेपाली जनतामा निहित सार्वभौमसत्ता, राष्ट्रिय अखण्डता, स्वाधिनता बाहेक सबैकुरा परिवर्तन गर्न पाइन्छ । त्यसकारण सरकारले संविधान विरोधी कुराहरु लेख्नु भएन । यसरि कार्यपत्रमा लेखेर फरक विचार भएको पार्टीहरुलाई दुःख दिने किसिमले जुन लेखिएको छ यसको म घोर विरोध गर्न चाहान्छु । यसरी संविधानले दिएको अधिकारलाई हनन गर्ने अधिकार सरकारलाई छैन । त्यसैले यो शब्द झिक्न म जोडदार माग गर्दछु ।’
सबैको विचार समेट्ने गरेर राष्ट्रिय सहमतिको आधारमा संविधान संशोधन गरिनुपर्ने उनको धारणा छ ।
प्रकाशित मिति: २२ बैशाख २०८२, सोमबार
