२० चैत्र २०७९, सोमबार
२० चैत्र, मोरङ । संघीय मामिला तथा सामान्य प्रशासनमन्त्री अमन लाल मोदीले संघीयताको सुदृढीकरणका लागि स्थानीय तहसँग अन्तरक्रिया थालेका छन् ।
मन्त्रालय अन्तर्गत्को प्रदेश तथा स्थानीय शासन कार्यक्रम (plgsp)मार्फत् मन्त्री मोदीले संघीयताको सुदृढीकरणको सन्दर्भमा सरोकारवालासँग अन्तक्र्रिया थालेका हुन् ।
सोमबार मोरङको कटहरी गाउँपालिकामा मन्त्री मोदीको उपस्थितिमा संघीयताको प्रभावकारी कार्यान्वयन र सुदृढीकरणसँगै अन्तर सरकारी समन्वय लगायतका विषयमा छलफल भएको हो । प्रदेश तथा स्थानीय तहका लागि संघीय सरकारले गर्नुपर्ने सन्वय र सहकार्यका विषयमा पनि अन्तरक्रियामा छलफल भएको थियो
अन्तरक्रियालाई सम्बोधन गर्दै मन्त्री मोदीले संघीयताको प्रभावकारी कार्यान्वयनमा स्थानीय तहको भूमिका महत्वपूर्ण रहेको बताए । स्थानीय तहलाई नीति निर्माणको सवालमा आफूहरुले समन्वय र सहकार्य गर्ने बताउँदै मन्त्री मोदीले भने, “स्थानीय तहले अब कसरी आत्मनिर्भर र बलियो बन्ने भन्नेतिर ध्यान दिन आवश्यक छ ।”
उनले अरुको मुख ताकेर मात्रै सबल बन्न नसक्ने भएकाले स्थानीय तहले अब आत्मनिर्भर हुनेखालका कार्यक्रम ल्याउनुपर्ने समेत बताए । स्थानीय तहले सुशासनको क्षेत्रमा गरिरहेको कामको सन्दर्भमा अनुभव आदानप्रदान गर्न आवश्यक रहेको समेत मन्त्री मोदीको भनाई थियो ।
“स्थानीय तहको सबलीकरण र वृद्धि विकासका लागि हाम्रो मन्त्रालयले कार्यक्रमहरु अगाडि बढाइरहेका छौँ” मन्त्री मोदीले भने, “संघ, प्रदेश र स्थानीय सरकारबीचको जनसम्बन्ध कसरी बलियो बनाउने, प्रदेश र स्थानीय तहको नीति निर्माणमा कसरी मद्दत गर्न सकिन्छ भन्नेतिर अहिले हाम्रो मन्त्रालयको ध्यान छ ।”
स्थानीय तहमा देखिएको विकृति र विसंगति हटाएर जनताको समस्या समाधानमा स्थानीय सरकारले विशेष ध्यान दिनुपर्ने पनि मन्त्री मोदीको भनाई थियो ।
अन्तक्र्रियामा कटहरि गाउँपालिकाका अध्यक्ष देवराज चौधरी, उपाध्यक्ष सीतादेवी राजवंशी, वडाध्यक्ष एवं कार्यपालिका सदस्य, प्रदेश तथा स्थानीय शासन कार्यक्रमका राष्ट्रिय कार्यक्रम व्यवस्थापक भुपेन्द्र सापकोटा लगायत उपस्थित थिए ।
प्रदेश तथा स्थानीय शासन कार्यक्रमले मन्त्री मोदीको उपस्थितिमा इलामको सुर्योदय नगरपालिकामा पनि मंगलबार अन्तक्र्रिया गर्दैछ ।
प्रकाशित मिति: २० चैत्र २०७९, सोमबार
