१३ फाल्गुन २०८१, मंगलवार
मुस्ताङ। नेपालमा पहिलोपटक हिउँ चितुवा (प्यान्थेरौनिका) को उद्धार गरी प्राकृतिक वासस्थानमा छाडिएको छ । गत बिहीबार मुस्ताङको वारागुङ मुक्तिक्षेत्र गाउँपालिका–३ समरका नविनकुमार गुरुङको च्याङग्राको खोरमा पसेकाे हिउँ चितुवालाई नियन्त्रणमा लिएर प्राकृतिक वासस्थानमा छाडिएको हो ।
अन्नपूर्ण संरक्षण क्षेत्र आयोजना (एक्याप) लोमान्थाङका प्रमुख उमेश पौडेलका अनुसार स्थानियबासीले दिएकाे सूचना पछि खोरमा पसेको चितुवालाई इलाका प्रहरी कार्यालय छुसाङबाट खटिएको प्रहरी, नेपाली सेना, एक्यापका कर्मचारी र स्थानीयबासीहरुको टोलीले नियन्त्रणमा लिएको थियो।
हिउँ चितुवालाई फलामको खोरको पासोमा पारेर नियन्त्रणमा लिईएको र प्राकृतिक बास्थानमा लगेर छाडिएको पौडेलले जानकारी दिए । पछिल्लो समय मुस्ताङमा हिउँ चितुवाले गाउँभित्र पसेर घोडा, खच्चड, भेँडा, च्याङग्रा र चौरीको गोठमा क्षति पुर्याउन थालेको छ ।
पछिल्लाे समय आहाराको खोजीमा हिउँ चितुवा मानव वस्ति र गोठमा पसेर क्षेति पुर्याउने गरेकाे छ । पौडेलले नेपालको संरक्षण इतिहासमा हिउँ चितुवाको उद्धार गरी प्राकृतिक वासस्थानमा छाडिएको पहिलो घटना भएको जानकारी दिए ।
प्रकाशित मिति: १३ फाल्गुन २०८१, मंगलवार
