२४ मंसिर २०८१, सोमबार
काठमाडौँ। सरकारका मुख्यसचिव एकनारायण अर्यालले कर्मचारीले उच्च मनोबलका साथ काम गर्न नसक्दा जनतालाई प्रभावकारी सेवा दिन नसकेको बताएका छन् ।
आईतवार प्रतिनिधि सभाअन्तर्गतको राज्य व्यवस्था तथा सुशासन समिति बैठकमा सङ्घीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकमाथिको छलफलमा सांसदहरुले राखेका जिज्ञासाहरुको जवाफ दिँदै मुख्यसचिव अर्यालले यस्तो बताएका हुन् ।
उनले संविधानमा भएका हक र अधिकार तथा ऐन र कानूहरुको कार्यान्वयन गर्ने माध्यम कर्मचारीतन्त्र भएपनि कर्मचारीहरु प्रेरित, सक्षम, पारदर्शी र व्यवसायिक नभएको कारण कार्यान्वयनमा समस्या भइरहेको बताए । जुन पद्धतिबाट कर्मचारीतन्त्र सञ्चालन गर्नुपर्ने हो त्यो पद्धतिबाट सञ्चालन गर्न नसक्दा विकृतिहरु बढ्दै गएको उनको भनाइ छ । उनले प्रदेश र संघकै कानूनहरु बाझिदा स्वयं कर्मचारीहरुले समेत समस्या भोग्नुपरेको उल्लेख गरेका छन् ।
उनले भने, ‘कर्मचारीले उच्च मनोबलका साथ काम गर्न नसक्दा जनतालाई प्रभावकारी रुपमा सेवा दिन सकिएको छैन । त्यसकारण हामीले समितिमा भएका कानूनहरु, संविधानमा उल्लेखित हकहरु र कानूनहरुको कार्यान्वयन गर्ने टुल भनेको कर्मचारीतन्त्र नै हो । कर्मचारीतन्त्र काम गर्न प्रेरित, सक्षम, पारदर्शी र व्यवसायीक भएन भने ति कुराहरु कार्यान्वयन गर्न सकिदैन । अहिले हामीले स्थायी संयन्त्र भनिरहेका छौं तर बिडम्वनाका साथ भन्नुपर्छ अस्थायी जस्तो भएको छ । किनभने जुन पद्धतिबाट सञ्चालन गर्नुपर्ने कर्मचारीतन्त्र हो त्यो पद्धत निर्माण गर्न नसक्दा विभिन्न खालका विकृतिहरु सर्जना हुन गएका छन् । जस्तो असर प्रत्यक्ष रुपमा जनतालाई पर्न गएको छ । आर्थिक र सेवा प्रवाहको हिसावमा अहिले प्रत्येक वडा र पालिकामा मान्छेहरु हुनुपथ्र्यो, प्रदेशका मन्त्रालयहरुमा त्यही हिसावका मान्छेहरु हुनुपथ्र्यो त्यस्तो छैन । सबैभन्दा ठूलो समस्या प्रदेशहरुले आआफ्नो हिसाबले कानूनहरु बनाउनु भयो त्यसमा सेवानिवृत्त ६० वर्षमा बनाउनुभएको छ । तर हाम्रो प्रचलित निजामति सेवा ऐनमा चाहीँ ५८ वर्ष छ । अब हामीले पेन्सनपट्टा कसरि बनाइदिने भन्ने समस्या भएको छ । अहिले २०० जना कर्मचाीले यही दुःख पाइराखेको अवस्था छ ।’
कर्मचारी समायोजनको पद्धति नबन्दा धेरै कर्मचारी समायोजनमा समस्या भइरहेको उल्लेख गर्दै उनले संघीय निजामति विधेयक टुंगोमा पुगे केही सहज हुने बताए ।
प्रकाशित मिति: २४ मंसिर २०८१, सोमबार
