१६ मंसिर २०८१, आईतवार
काठमाडौँ । घानाको आम चुनावमा राष्ट्रपतिका उम्मेदवारहरूले एक सम्झौतामा हस्ताक्षर गरेका छन् । चुनाव अघि र पछि शान्ति सुनिश्चित गर्ने सम्झौतामा हस्ताक्षर गरेका हुन् । घानाको राजधानी अक्रामा आयोजित एक समारोहमा उपराष्ट्रपति महामुदु बावुमिया, पूर्वराष्ट्रपति जोन द्रामणि महामा र अन्य दलका नेताहरूले आ–आफ्नो दलका तर्फबाट हस्ताक्षर गरेका थिए । बवुमियाले स्वतन्त्र र निष्पक्ष निर्वाचन सुनिश्चित गर्न सम्बन्धित सबै निकाय र व्यक्तित्वसँग मिलेर काम गर्ने प्रतिवद्धता व्यक्त गरे ।
राष्ट्रिय प्रजातान्त्रिक कँग्रेसको प्रतिनिधित्व गर्दै पूर्वराष्ट्रपति महामाले शान्तिपूर्ण लोकतान्त्रिक राष्ट्रको रूपमा घानाको प्रतिष्ठा कायम राख्नको लागि वास्तविक प्रयास आवश्यक रहेको भन्दै सबै दलहरूलाई आ–आफ्नो प्रतिवद्धताअनुसार काम गर्न आग्रह गरेका छन् ।
घानाका निर्वाचन आयोग (ईसी) का अध्यक्ष जीन मेन्साले निर्वाचनको पारदर्शिता सुनिश्चित गर्ने प्रतिवद्धता जनाएका छन् ।
आयोगका अनुसार घानावासीहरूले डिसेम्बर ७ मा नयाँ राष्ट्रपति र २७६ संसद सदस्यहरू चयन गर्न मतदान गर्नेछन् ।
प्रकाशित मिति: १६ मंसिर २०८१, आईतवार
