१३ मंसिर २०८१, बिहीबार
काठमाडौँ। प्रमुख प्रतिपक्ष दल नेकपा (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहालले सरकारले आफू नेतृत्वको अघिल्लो सरकारले गरेका सबै राम्रो कामविरुद्ध केन्द्रित भएको आरोप लगाएका छन् ।
योग्यलाई जिम्मेवारी दिने गरी त्रिभूवन विश्वविद्यालयको उपकुलपतिलगायतका पदाधिकारी नियुक्तिको विषय, लोडसेडिङ अन्त्यका लागि भुमिका खेल्ने अधिकारी लगायतविरुद्ध सरकारले काम गरिरहेको आरोप लगाएका हुन् । अध्यक्ष दाहालले आफूले भ्रष्टचारविरुद्ध अभियान छेडेपछि सरकारबाट हट्नुपरेको पनि दोहोर्याएका छन् ।
बिहीवार कीर्तिपुरमा आयोजित चुनावी सभामा बोल्दै उनले पार्टीको तर्फबाट मेयरको उम्मेदवार बनेका शिवशरण महर्जनलाई सबैको साझा उम्मेदवार भएको भन्दै विजयी गराउन पनि अपिल गरे । अध्यक्ष दाहालले महर्जन इमान्दार व्यक्तित्व भएकाले उनले कीर्तिपुरवासी जनताको सेवामा समर्पित भएर काम गर्ने आश्वासन समेत दिएका छन् ।
अध्यक्ष दाहालले आफ्नो पार्टीका उम्मेदवार महर्जनले जिते कीर्तिपुरलाई शैक्षिक हवको केन्द्रको रुपमा विकास गर्ने आश्वासन समेत दिएका छन् ।
प्रकाशित मिति: १३ मंसिर २०८१, बिहीबार
