१३ चैत्र २०७९, सोमबार
१३ चैत्र, काठमाडाैँ । धरान उपमहानगरपालिकाका मेयर हर्क साम्पाङले व्यक्तिगत उपहार नदिन अनुरोध गरेका छन् । उनले पछिल्लो समय आफुँलाई उपहार दिनेहरूको संख्या बढ्दै गएपछि व्यक्तिगत उपहार नदिन अनुरोध गरेका हुन् ।
उनले व्यक्तिगत उपहार दिनुको सट्टा विकास निर्माणका काममा प्रयोग हुने गैती र बेल्चा सहयोग गर्नु उत्तम हुने बताएका छन् ।
एक कार्यक्रममा बोल्दै साम्पाङले भनेका छन्, ‘मलाई सम्मान गर्ने, उपहार दिने व्यक्ति अत्यन्तै देख्छु । त्यो नगर्नुस्, उपहार दिए पनि बेल्चा र गैती दिनुस् । सम्मान नदिनुस्, सहयोग दिनुस् ।’
उनले सोही क्रममा आफुलाई सल्लाहको समेत आवश्यकता नभएको दाबी गरेका छन् । उनले आफुसँग अथाह भिजन भएको बताउँदै सल्लाहको आवश्यकता नभएको जिकिर गरे ।
मेयर साम्पाङले निर्वाचित हुनुभन्दा अघि नै धरानमा खानेपानी ल्याउने योजना भएको प्रष्ट पारेका थिए । उनी गत बैशाखको स्थानीय तहको निर्वाचनबाट मेयरमा निर्वाचित भएर पदभार ग्रहण गरेको केही दिनमै खानेपानी योजना सफल बनाउन लागिपरिरहेका छन् ।
केही महिनासम्म उनी श्रमदानलाई प्रोत्साहन गरिरहेका थिए । अहिले उनी श्रमदानलाई पनि निरन्तर उत्साहित गरिरहँदा चन्दा सङ्कलनमा समेत लागि परेका छन् ।
धरानमा खानेपानी योजनाका लागि भन्दै धरानमा च्यारिटी कन्सर्ट समेत हुने भएको छ । आगामी चैत्र १५ गते हुने ‘ कोकाहा खानेपानी कन्सर्ट’मा दिपक लिम्बु, प्रविशा अधिकारी, एकदेव लिम्बु, दिल्ली फोम्बो एण्ड ब्याण्ड, द वाकिङ क्लाउड ब्याण्ड, एपि शेर्पा, रोहित मास्के र दीप श्रेष्ठको समेत प्रस्तुति रहनेछ ।
यसैबिच, मेयर साम्पाङले सहयोग सङ्कलनै लागि अष्ट्रेलिया समेत जाने भएका छन् । गत बुधबार फेसबुकमा उनले लेखेका छन्, ‘म आफ्नो खुसीको लागि होइन ! धरानको विकासको लागि Fund Raising को लागि नगरपालिकाको एकै पैसा पनि खर्च नगरी अस्ट्रेलिया जाने भएको छु !’ 
प्रकाशित मिति: १३ चैत्र २०७९, सोमबार
