३ आश्विन २०८१, बिहीबार
काठमाडौं । राष्ट्रिय सभा सदस्य वामदेव गौतमले कम्युनिस्ट पार्टीहरुलाई एकतावद्ध गर्ने आफ्नो सङ्कल्प रहेको बताएका छन् ।
बिहीवार कार्ल विक्रम थापाद्वारा लिखित ‘अमेरिकाको सङ्क्षिप्त इतिहास र संविधान’ पुस्तक लोकार्पण तथा विमर्श कार्यक्रममा बोल्दै राष्ट्रिय सभा सदस्य गौतमले कम्युनिस्ट पार्टीहरुलाई एकीकरण गरेर एउटै पार्टी बनाउने आफ्नो उद्देश्य रहेको भन्दै सोही अनुरुप काम गरिरहेको बताए ।
उनले कम्युनिस्ट पार्टीहरुलाई एकतावद्ध गर्नका लागि आफु बाहेक अरुले भुमिका खेल्न नसक्ने जिकिर गर्दै अन्य कम्युनिस्ट पार्टीका नेताहरु एकआपसमा शत्रुवत व्यवहार गरिरहेका र आफ्नो सबैसँग मित्रवत सम्बन्ध रहेको भन्दै आफूले एकतावद्ध गर्नसक्ने दाबी गरे । उनले कम्युनिस्ट पार्टीहरु एकतावद्ध हुनुको विकल्प नभएको पनि बताए ।
राष्ट्रिय सभा सदस्य वामदेव गौतमले विगतमा आफ्नै प्रयासमा तत्कालिन नेकपा(एमाले) र नेकपा(माओवादी केन्द्र)बिच एकता गरेर नेपाल कम्युनिस्ट पार्टी(नेकपा) बनाएको भएपनि आफू लगायतका शिर्ष नेताहरुले बुद्धि पुर्याउन नसक्दा एकता नटिकेको बताए ।
प्रकाशित मिति: ३ आश्विन २०८१, बिहीबार
