काठमाडौंमा महानगरको आतंक मच्चियोः प्रभु साह

काठमाडौं। आम जनता पार्टीका अध्यक्ष तथा सांसद प्रभु साहले पछिल्लो समय काठमाडौंमा महानगरको आतंक मच्चिएको टिप्पणी गरेका छन् ।

शुक्रवार प्रतिनिधिसभा बैठकमा बोल्दै सांसद साहले भने, ‘काठमाडौंमा महानगरको आतंक चलेको छ भने सडकमै स्वरोजगार मजदुरहरू कुटिन्छन् । कवाड व्यवसायीहरूमाथि डोजर चलाइएको छ । सुकुम्बासीहरुलाई आतंकित बनाइएको छ ।’ उनले महानगरपालिकामाथि कानुन लाग्छ कि लाग्दैन ? भन्दै प्रश्न समेत गरेका छन् ।

‘यदि लाग्छ भने सरकारले महानगरपालिकालाई नियमन गरोस् भनेर म आग्रह गर्न चाहन्छु । अहिले कवाड व्यवसायीहरू महानगरबाट आतंकित छन् । उनीहरू असुरक्षित छन् । उनीहरू त्रसित छन्’, उनले भने, ‘हरेक व्यक्तिले व्यापार तथा व्यवसाय गर्न पाउँछ, यो उसको संवैधानिक हक हो । त्यसको रक्षा राज्यले गर्ने हो कि होइन ?’

उनले कवाड व्यवसायीहरूको सुरक्षाको प्रत्याभूति गर्नका लागि गृह मन्त्रालयको ध्यानाकर्षण समेत गराएका छन् । कसैलाई पनि गैर कानुनी ढङ्गले आफ्नो पेशा तथा व्यवसायबाट वञ्चित गर्न नमिल्ने भन्दै उनले महानगरपालिकाले कवाड व्यवसायीहरूलाई मनोमानी ढङ्गले आतंक सिर्जना गरेर दुःख दिने काम गरेको बताएका छन् ।