१७ फाल्गुन २०८०, बिहीबार
काठमाडौं। बुक बिल्डिङ प्रक्रियाबाट आईपिओ जारी गरेको सर्वोत्तम सिमेन्टको आईपीओ १९ अर्ब रुपैयाँभन्दा बढीको आवेदन परेको छ । सिडिएस एण्ड क्लियरिङ लिमिटेडका अनुसार सो आईपीओमा १९ अर्ब ४० करोड ८४ लाख ३३ हजार २ सय ८३ रुपैयाँ बराबरको आवेदन परेको हो ।
त्यसैगरी, ५ करोड ३७ लाख ७७ हजार ८ सय ७० कित्ताका लागि आवेदन परेको छ, तर सर्वोत्तमले भने २७ लाख ७६ हजार ७६ कित्ताका लागि मात्र आवेदन खुलाएको थियो । १० लाख १५ हजार २११ जनाले सर्वोत्तमको आईपीओमा आवेदन दिएका हुन् ।
त्यस्तै, सर्वोत्तम सिमेन्टले बुक बिल्डिङ विधिबाट निर्धारण भएको प्रतिकित्ता ३६०।९० रुपैयाँ मूल्यमा आईपीओ जारी गरेको हो । उक्त कम्पनीको सेयर निष्कासन तथा बिक्री प्रबन्धकको काम ग्लोबल आइएमई क्यापिटलले गरेको हो ।
सर्वोत्तम सिमेन्टले पहिलो पटक बुक बिल्डिङ विधिमार्फत सर्वसाधारणलाई फागुन १३ गतेदेखि कुल २७ लाख ७६ हजार ७६ कित्ता आइपीओ निष्कासन तथा बिक्री खुला गरेको हो । फागुन १६ गतेसम्म आवेदन दिने समय राखिएको थियो ।
प्रकाशित मिति: १७ फाल्गुन २०८०, बिहीबार
