१४ फाल्गुन २०८०, सोमबार
काठमाडौं। लघुवित्तिय संस्था विरुद्धको सङ्घर्ष समिति नेपाल केन्द्रीय समितिले संसद् भवन घेराउ गर्ने क्रममा प्रहरीसँग झडप भएको छ । विभिन्न माग राख्दै विरोध जुलुस सहित संसद् भवनतर्फ अघि बढेको जुलुस र प्रहरीबीच वानेश्वरमा झडप भएको हो ।
करिब ५० जना आन्दोलनकारीहरू संसद् भवन परिसरमै प्रवेश गरेर आन्दोलन गरेका हुन् । नयाँबानेश्वरस्थित सङ्घीय संसद् भवनमा संसद् बैठक चलिरहेका बेला उनीहरू संसद् भवन परिसरमै नाराबाजी गर्न पुगेका हुन् ।
पीडितहरुले नव सामन्तीको रूपमा स्थापित लघुवित्तीय संस्थाहरू खारेज गर्न, लघुवित्तीय संस्थाहरूद्वारा लगाइएको सामूहिक ऋण मिनाहा गर्न, गरिब किसानहरूलाई निःशुल्क ऋण प्रदान गर्न, आवश्यकता र क्षमतामा आधारित काम र दामको व्यवस्था गर्न तथा समाजवादी अर्थतन्त्रको विकास गर्न माग गर्दै आएका छन् ।
सङ्घीय सांसदभित्र प्रवेश पास विना जान दिइँदैन भने सङ्घीय संसद् वरपरको क्षेत्रलाई निषेधित क्षेत्र तोकेर प्रदर्शन गर्न निषेध गरिएको छ । अहिले सुरक्षा व्यवस्था कडा पारिएको छ । आन्दोलनकारीलाई कहाँ राखिएको छ भन्नेबारे केही खुलाइएको छैन । लघुवित्तको ऋण तिर्न नसकेर समस्यामा परेका पैदल हिँडेर काठमाडौं आएका उनीहरुरभ अर्थमन्त्रीको राजीनामा समेत मागेका थिए ।
जानकारहरूका अनुसार आन्दोलनकारी संसद भवन परिसर भित्र प्रवेश गरेर आन्दोलन गरेको सम्भवत यो पहिलो घटना हो । उक्त घटनाले सुरक्षा व्यवस्थामाथि नै गम्भीर प्रश्न खडा गरेको छ ।
प्रकाशित मिति: १४ फाल्गुन २०८०, सोमबार
