‘उपहार’मा पुरुषको पनि पिडा छः रेखा थापा

काठमाडौं। अभिनेत्री रेखा थापाले ‘उपहार’मा समाज रुपान्तरणदेखि नारीमात्र होइन, पुरुष पनि पीडित रहेको कुरा उठाइएको बताएकी छन् । ‘उपहार’ हरेक बर्गका दर्शकका लागि उपयुक्त फिल्म भएको उनको भनाई रहेको छ ।

‘उपहार’ दर्शकको मन मस्तिस्कमा बस्ने गरी लेखिएको र बनाइएको फिल्म हो’, उनले भनिन् ‘नेपाली फिल्म नियमित हेरिरहने र कहिल्यै नहेर्नेका लागि पनि यो उपयुक्त छ ।’ ‘उपहार’ सामाजिक विषयवस्तुलाई मनोरञ्जनपूर्ण हिसाबले प्रस्तुत गरेको उनको दाबी छ ।

‘हाम्रो फिल्म आँखालाई शीतल दिने किसिमको छ । फिल्ममा हरेक मान्छेको यात्रामा भेटिने सफलता र असफलता तथा प्रेम र बिछोडका कुरा दर्शकले पाउनुहुनेछ’, उनले थपिन् ।

रेखाका अनुसार फिल्म ‘उपहार’को कथा फरक छ । छायांकन, सम्पादन, संगीतलगायत सबै कुराले दर्शकलाई मनोरञ्जन दिन्छ ।

रेखा पाँच वर्षपछि फिल्म ‘उपहार’मार्फत दर्शकमाझ आउन लागेकी हुन् । पहिलो सन्तानलाई जन्मदिन परिवारसँग अमेरिकामा रहेकी रेखाले अमेरिकाबाटै फिल्मको विभिन्न माध्यमबाट प्रचार गरिरहेकी छन् ।

उनले निर्देशन र अभिनय गरेको फिल्म ‘मालिका’ आएको थियो भने पाँच वर्षपछि दर्शकमाझ आउन पाउँदा उनी उत्साहित छिन् । त्यस्तै, ज्ञानेन्द्र देउजा निर्देशित ‘उपहार’मा रेखाको अलवा, पूजा शर्मा, मुकुन भुषाल, बेनिशा हमाल, तेज गिरी, समर्पणजंग कार्की, सुष्मा कार्की, शिशिर राणा, राजाराम पौडेल, किरण केसी, अंशु महर्जन, विनोद पौडेल, आशा भुषाल, शोभारस घिमिरे, मन्जु श्रेष्ठ, कमल भट्ट, राइडर प्रशान्त र सरिता राजोपाध्यायलगायतको पनि अभिनय रहेको छ ।