२३ माघ २०८०, मंगलवार
काठमाडौं। नेकपा (एमाले) का सांसद वसन्तकुमार नेम्बाङको स्वास्थ्यमा क्रमिकरुपमा सुधार भइरहेको छ ।
ललितपुरको नेपाल मेडिसिटी अस्पतालमा उपचाररत उनको स्वास्थ्यमा क्रमिक सुधार आइरहेको स्वकीय सचिव गणेश योङहाले जानकारी दिएका छन् । “उनी बोल्न खोजे पनि प्रस्ष्टसँग बोल्न सकेका छैनन् । उनले बोलेका कुनै शब्द मात्र बुझिन्छ”, योङहाले भने, “सांसद नेम्बाङको स्वास्थ्यमा क्रमिक सुधार भइरहेको छ ।”
उक्त अस्पतालमा सांसद नेम्बाङको फिजियोथेरापी नियमित भइरहेको छ । डा. गोपालरमण शर्माको नेतृत्वमा डा. बाबुराम पोख्रेल, डा. प्रसन्ना कार्की लगायतका चिकित्सकको समूहले उनको उपचार गरिरहेका छन् ।
नेकपा (एमाले) का केन्द्रीय सदस्यसमेत रहनुभएका नेम्बाङ पाँचथरबाट प्रतिनिधि सभामा निर्वाचित भएका हुन् । यही माघ १७ गते ताप्लेजुङ गएका बेला उनलाई ‘ब्रेन स्ट्रोक’ भएपछि सोही दिन उपचारका लागि काठमाडौं ल्याइएको थियो ।
प्रकाशित मिति: २३ माघ २०८०, मंगलवार
