१ माघ २०८०, सोमबार
काठमाडौं। नेपाल आयल निगम लिमिटेडको रिक्त कार्यकारी निर्देशक पदका लागि १४ जनाले निवेदन दिएका छन् ।
उद्योग वाणिज्य तथा आपूर्ति मन्त्रालयले गत पुस सात गते सूचना जारी गर्दै दरखास्त आह्वान गरेको थियो । आइतबारसम्मको म्यादमा विभिन्न क्षेत्रमा काम गरेका १४ जनाले निवेदन दिएको मन्त्रालयले जनाएको छ ।
त्यस्तै, मन्त्रालयका अनुसार लोहारपट्टि नगरपालिका-तीन, महोत्तरीका कमलेन्द्रलाल कर्ण, बुढानीलकण्ठ नगरपालिका-आठ, काठमाडौंका उत्तरकुमार रेग्मी, भरतपुर महानगरपालिका-१४, चितवनका डा. डोलप्रसाद चापागाईँ, टोखा नगरपालिका-आठ, काठमाडौंका सहदेव चन्द, धनुषाधाम-दुई का रामदेव यादव र राजविराज-१३, सप्तरीका सञ्जीवकुमार श्रेष्ठले निवेदन दिएका छन् ।
उक्त मन्त्रालयका अनुसार मोरङका तीन जना पङ्कजकुमार दास, माधव रेग्मी र आमोदप्रसाद चौधरीले निवेदन दिएका छन् । त्यस्तै टोखा–छ, काठमाडौंका दिलीप शेखर श्रेष्ठ, भीमसेन थापा गाउँपालिका-एक, गोरखाका चण्डिकाप्रसाद भट्ट, लक्ष्मीपुर-आठ, दाङका वसन्तकुमार पाण्डे, बागलुङ नगरपालिका-नौ का डोलिन्द्रप्रसाद शर्मा र ललितपुर महानगरपालिका-२४ का शत्रुध्नप्रसाद पुडासैनीले निवेदन दिएको मन्त्रालयले जनाएको छ ।
त्यस्तै, आयल निगममा ०७५ यता खुला प्रतिस्थपर्धाबाट कार्यकारी निर्देशक छनोट थालिएको हो । मन्त्रालयको वाणिज्य तथा आपूर्ति सचिवको नेतृत्वमा छनोट समिति गठन हुने गरेको छ । सो समितिले निवेदन दिएका उम्मेदवारहरूलाई अन्तर्वार्ता र व्यावसायिक कार्ययोजनाको प्रस्तुतीकरणपछि अन्तिम तीन जनाको नाम मन्त्रिपरिषदमा पेस गर्ने र तीमध्ये एक जनालाई कार्यकारी निर्देशकको पदमा मन्त्रिपरिषद् बैठकबाट नियुक्त गर्ने प्रावधान रहेको छ ।
प्रकाशित मिति: १ माघ २०८०, सोमबार
