२९ मंसिर २०८०, शुक्रबार
काठमाडौं। फिफा द वेस्ट अवार्डका लागि फिफाले उत्कृष्ट पुरुष तथा महिला खेलाडीको विधाको मनोनयनमा परेका तीन–तीन खेलाडीको नाम सार्वजनिक गरेको छ। आगामी १५ जनावरीमा इंग्ल्यान्डको लन्डनमा विजेता घोषणा गर्नका लागि फिफाले महिला र पुरुष खेलाडीको नाम सार्वजनिक गरेको हो ।
मनोनयनमा परेका महिला खेलाडीहरूमा आइटाना बोनमाटी (स्पेन र एफसी बार्सिलोना), लिन्डा काइसेडो (कोलम्बिया र डिपोर्टिभो काली फेमेनिनो र रियल म्याड्रिड) र जेनिफर हर्मोसो (स्पेन-सिएफ पाचुका) छन् । त्यस्तै, १ अगस्ट २०२२ देखि २० अगस्ट २०२३ सम्मको प्रदर्शनको आधारमा उत्कृष्ट तीन महिला खेलाडीको नाम सार्वजनिक गरिएको हो । विज्ञहरूको प्यानलद्वारा छनोट गरी कुल १६ खेलाडीहरू सुरुमा उत्कृष्ट फिफा महिला खेलाडी अवार्डका लागि मनोनयन गरिएको थियो ।
यसबाट तीन खेलाडीको नाम संसारभरका महिला राष्ट्रिय टोलीका प्रशिक्षक, महिला राष्ट्रिय टोलीका कप्तान, फुटबल पत्रकार र फिफाको आधिकारिक वेबसाइटमा मतदान गर्ने फ्यानको भोटको आधारमा निर्णायक मण्डलद्वारा छनोट गरिएको छ ।
त्यसैगरी, १९ डिसेम्बर २०२२ देखि २० अगस्ट २०२३ सम्मको अवधिका गरेको प्रदर्शनको आधारमा तीन पुरुष खेलाडीको नाम सर्ट लिस्टका लागि घोषणा गरिएको छ । मनोनयनमा परेका पुरुष खेलाडीहरूमा इर्लिङ हालान्ड (नर्वे र म्यानचेस्टर सिटी), केलियन एमबाप्पे (फ्रान्स र पेरिस सेन्ट(जर्मेन), लिओनल मेसी (अर्जेन्टिना र पेरिस सेन्ट जर्मेन र मायमी) छन् ।
त्यस्तै, कुल १२ खेलाडीहरू प्रारम्भमा उत्कृष्ट फिफा पुरुष खेलाडीको अवार्डका लागि मनोनयन गरिएको थियो । जसलाई विशेषज्ञहरूको प्यानलले छनोट गरेको थियो ।
उक्त सूचीबाट तीन खेलाडीको नाम संसारभरका पुरुष राष्ट्रिय टोलीका प्रशिक्षक, पुरुष राष्ट्रिय टोलीका कप्तान, फुटबल पत्रकार र विश्वभरका फ्यानहरू फिफा डटकममा गरेको भोटको आधारमा तय भएको हो ।
प्रकाशित मिति: २९ मंसिर २०८०, शुक्रबार
