२५ मंसिर २०८०, सोमबार
काठमाडौं। काठमाडौंको बूढानीलकण्ठमा लैङ्गिक हिंसाविरुद्ध सचेतना फैलाउन चित्रकला प्रदर्शनी गरिएको छ । लैङ्गिक हिंसाविरुद्धको १६दिने अभियानको अवसरमा बूढानीलकण्ठ नगरपालिकाद्वारा आयोजना गरिएको उक्त प्रदर्शनीमा ४९ कलाकारका सिर्जना समावेश छ ।
नेपाल प्रहरीको तथ्याङ्कअनुसार कुल लैङ्गिक हिंसामध्ये ८९ प्रतिशत चिनाजानका मानिसबाट भएको छ भने समग्रमा ८० प्रतिशत घटना घरेलु हिंसाका रहेको उल्लेख छ । त्यसैले घर छिमेकमा हुने यस्ता घटना रोक्न लैङ्गिक हिंसाविरुद्ध सकारात्मक सचेतना दिने र सकारात्मक भाव झल्किने खालका चित्र समावेश गरेर प्रदर्शन गरिएको नगरपालिकाले जनाएको छ ।
उक्त नगरपालिकाका प्रशासकीय अधिकृत केदारकुमार खड्काका अनुसार हरेक क्षेत्रले कुनै न कुनै माध्यामबाट हिंसाविरुद्ध सचेतना फैलाउनुपर्नेमा जोड दिँदै नगरपालिकाले पनि सोही अनुसार कला प्रदर्शनी आयोजना गरेको बताए ।
त्यसैगरी, हरेक क्षेत्रबाट यसैगरी हिंसाविरुद्ध सचेतना फैलाउने हो भने घटना न्यूनीकरणमा सहयोग पुग्ने कलाकार दिपेन्द्रमान बनेपालीले बताए । उनले ४९ जना कलाकारले चित्रमार्फत हिंसाविरुद्धको अभियानमा ऐक्यबद्धता जनाउँदै सचेतना फैलाउन योगदान गरेको जानकारी गराए । त्यस्तै, कलाकार दिपेन्द्रमान बनेपाली र सुमित्रा श्रेष्ठले कला प्रदर्शनीको संयोजन गरेको थियो ।
नेपालमा पछिल्लो समयमा लैङ्गिक हिंसाका घटना बढिरहेका छन् भने हिंसाका घटना प्राय आफन्त र चिनेजानेका व्यक्तिबाटै बढी हुने गरेको प्रहरीको तथ्याङ्कमा उल्लेख गरिएको छ । त्यस्तै, अझ कम उमेरका बालबालिका यसको सिकार भइरहेका छन् ।
प्रकाशित मिति: २५ मंसिर २०८०, सोमबार
