१३ कार्तिक २०८०, सोमबार
पोखरा । पोखराको मित्रमिलन सहकारी संस्थाविरुद्ध सहकारी रजिष्ट्रारको कार्यालय, गण्डकीमा बचतकर्ताले उजुरी दिएका छन् । आफूहरुको बचत हिनामिना भएको र फिर्ता माग्दासमेत नदिएकोे दाबी गर्दै उनीहरु सहकारी रजिष्टारको आइतबार शरणमा पुगेका हुन् । आइतबार सहकारी रजिष्टारको कार्यालय गण्डकीले आवश्यक छानबिनका लागि जिल्ला प्रहरी कार्यालय कास्कीलाई पत्र लेखेको थियो । सहकारी प्रदेश सहकारी रजिष्टारअन्तर्गत खुलेकोले सबैभन्दा पनि उसैले छानबिन गरेर हामीलाई प्रतिवेदन बुझाउनपर्छ, त्यसका लागि हामीले पनि पत्र पठाइसकेको जिल्ला प्रहरी कार्यालय प्रमुख एसपी मोहन थापाले भने ।
सहकारी रजिष्ट्रारको कार्यालय, गण्डकीका निमित्त प्रमुख ईश्वरी ढकालले मित्रमिलनका ३४ जना बचतकर्ताले एकसाथ उजुरी दिएको जानकारी दिइन् । सहकारी रजिष्टारको कार्यालयले प्रतिवेदन दिनासाथ आफूहरु कानुनी कारबाहीका लागि तयार रहेको एसपी थापाले जानकारी दिए । रजिष्टार कार्यालयले अध्ययन गरेर फेहरिस्त प्रतिवेदन पठाएपछि उनीहरुको भूमिका सुरु हुने उनले बताए । मित्रमिलन सहकारीका अध्यक्ष र प्रबन्धक भने यतिबेला प्रहरी हिरासतमा छन् । बचतकर्तालाई दिएको चेक नसाटिएपछि अध्यक्ष रमण पौडेल र प्रबन्धक किरण अधिकारीविरुद्ध उजुरी परेको थियो ।
बचतकर्ताको उजुरीका आधारमा गत शनिबार उनीहरु प्रक्राउ परेका हुन् । एसपी थापाले बैंकिङ कसुरमा पक्राउ परेका पौडेल र अधिकारीमाथि अनुसन्धान भइरहेको जानकारी दिए । २२ सयजनाभन्दा बढी बचतकर्ताको रकम फिर्ता गर्न नसकेपछि अहिले मित्रमिलन सहकारी संकटमा छ । सहकारीमा पैसा बचत गरेका बचतकर्ताहरु दैनिक धाउँदा पनि फिर्ता नपाएको गुनासो गर्दै आएका छन् । सहकारीका अनुसार करिब २० करोड रुपैयाँ बचत फिर्ता गर्न बाँकी छ ।
प्रकाशित मिति: १३ कार्तिक २०८०, सोमबार
