२७ आश्विन २०८०, शनिबार
२७ ,असोज ,काठमाडौँ । शनिबार विहान दुर्घटनामा परेको मनाङ एयरको हेलिकप्टरका पाइलट प्रकाश सेढाईंलाई उपचारका लागि मुम्बई लगिने भएको छ ।
उनको उपचार भइरहेको ह्याम्स अस्पतालले शनिबार साँझ एक विज्ञप्ति जारी गरी पाइलट सेढाईंलाई थप उपचारका लागि शनिबार नै भारतको मुम्बईस्थित नेशनल बर्न सेन्टरमा लैजाने तयारी भएको जानकारी दिएको छ ।
उपचारमा संलग्न ह्याम्स अस्पतालका कन्सल्ट्यान्ट इन्टेन्सिभिस्ट डा. सविन कोइरालाले विज्ञप्तिमा भनेका छन्, ‘उहाँलाई उहाँको परिवार तथा एयरलाइन्ससँगको सरसल्लाहमा थप उपचारका लागि भारतको नेशनल बर्न सेन्टर मुम्बईमा लैजाने तयारी भइरहेको छ ।’
मनाङ एयरको ९ एन–एएनजे कलसाइन भएको हेलिकप्टर शनिबार विहान सोलुखुम्बुको लुक्लाबाट लोबुचेतर्फ जाने क्रममा दुर्घटनामा परेको थियो । हाइ अल्टिच्युडमा रहेका पर्यटक उद्धारका लागि गएको हेलिकप्टर दुर्घटनामा परेको थियो । हेलिकप्टरमा पाइलट सेढाईंमात्र सवार थिए ।
दुर्घटनापछि उनलाई उपचारका लागि हेलिकप्टरबाट ह्याम्स अस्पताल ल्याइएको थियो । अस्पतालका अनुसार उनको भेन्टिरलेटरमा राखेर उपचार भइरहेको छ ।
‘उहाँको मुखको भाग, हातखुट्टा लगायत ४५ देखि ५० प्रतिशत शरीर जलेको अवस्था छ । साथै उहाँको फोक्सो र मेरुदण्डको हड्डी तथा किड्नीमा पनि समस्या छ । उहाँको शरीर र हातको उपचारको लागि अपरेसन कक्षमा डेब्रिडमेन्ट र इस्काराक्टोमी गरी उपचार भएको छ’, डा. कोइरालाले विज्ञप्तिमा भनेका छन् ।
प्रकाशित मिति: २७ आश्विन २०८०, शनिबार
