सिजी नेट को इन्टरनेट सेवामा चरम लापरबाही , सेवाग्राही आक्रोशित !

काठमाडौँ । सिजी नेटको इन्टरनेट सेवामा पुनः समस्या देखा परेको छ। इन्टरनेट नचलेको र ग्राहक सेवा केन्द्रमा समेत सम्पर्क हुन नसकेको भन्दै सेवाग्राहीहरू एकाएक सामाजिक सञ्जालमा आक्रोशित बन्दै खरो उत्रिरहेका छन्।

इन्टरनेट हाम्रो आधुनिक जीवनको अभिन्न अङ्ग बनिसकेको छ, यति धेरै, कि संयुक्त राष्ट्रले पनि इन्टरनेट पहुँच मानव जातिको एक आधारभूत अधिकार हो भन्छ। यद्यपि सबैको धारणा एकै नहोला तर व्यावसायिक आवश्यकताहरूदेखि व्यक्तिगत मनोरञ्जनसम्म आधारभूत डिजिटल समाजीकरणसम्म, इन्टरनेटमा हाम्रो निर्भरताले हाम्रो जीवनलाई अन्तरसम्बन्धसित आनन्द प्रदान गरेको छ।

बढ्दो पूर्वाधार, किफायती, र यसको पहुँचको आधारमा भन्ने हो भने इन्टरनेटको प्रयोगकर्ता बढ्दो सङ्ख्यामा मात्रै देख्न सकिन्छ।

नेपालमा इन्टरनेट सेवा प्रदायकहरु बिच पछिल्लो समय निक्कै नै कस्सा कस्सि चलिरहेको छ, उक्त कस्सा कस्सिको श्रेय भने CG Net लाई नै जान्छ। विगतमा ८० एम्बिपिएस ब्यान्डविथ भन्दा माथिको स्पिडमा इन्टरनेट नदिएका उक्त सेवा प्रदायकहरू अहिले २०० भन्दा माथिको ब्यान्डविथको इन्टरनेट उपलब्ध गराउँदै आएका छन्।

धूमधाम फुर्तिफार्तिका साथ सस्तोमा गुणस्तरीय इन्टरनेट सेवा दिने भन्दै प्रचार- प्रसार गरिएको १२० एम्बिपिएस ब्यान्डविथको CG Net २० देखि ५०एम्बिपिएस ब्यान्डविथ को दायरामा चल्छ भने फाट्टफुट्ट ५० कट्ने सम्भावना रहन्छ।

नेपाली इन्टरनेट सेवा प्रदायकहरूले देखाएको परम्परागत ठगीको धन्दा त छोडेन नै, अझ अरूको तुलनामा यसको ग्राहक सेवाको पाटो झनै खराब छ, केही मुख्य ठाउँहरूमा मात्रै बिस्तार हुँदै आइरहेको उक्त इन्टरनेट सेवा प्रदायकले आफ्ना ग्राहकहरूलाई भने खास्सै चासोको विषय बनाएको देखिदैंन, इन्टरनेटमा समस्या आएर फोन गर्दा होस् या अन्य सहयोगका लागि होस् ग्राहक सेवा केन्द्रले न त कल नै रिसिभ गर्छ न त समस्या बताइसकेपछि चुस्त समाधान हुन्छ।

कम्पनीको वेबसाइटसहित ग्राहक समर्थन च्यानलहरू, फोन लाइनहरू र अनलाइन च्याट सेवाहरूसमेत बन्द भएसँगै उपभोक्ताहरूले सम्पर्कसमेत गर्न सकेका छैनन् ।
गुनासो नै पोख्ने ठाउँ नपाएपछि धेरै ग्राहकहरू निराशा र चिन्ता व्यक्त गर्न सोसल मिडियामा गएका छन्। आफूहरू धेरै समयदेखि इन्टरनेटविहीन भएको र कम्पनीबाट कुनै प्रतिक्रिया नपाएको उनीहरूको भनाई छ ।

इन्टरनेटको समस्याबारे कम्पनीले कुनै सम्बोधन गरेको छैन । के कारणले बिग्रेको हो र कहिले बन्छ भन्नेसम्म जानकारी नगराएपछि ग्राहकहरूमा थप अन्यौलता छाएको छ । यसबारे हामीले कम्पनीमा सम्पर्क गर्न खोज्दा समेत सम्पर्क हुन सकेको छैन।

९ सय ९९ रुपैयाँमै १२० एमविपिएस गति सहितको योजनाले सुरुवातबाटै चर्चा बटुलेको सिजी नेटले ६ सय ४९ रुपैयाँमै पचास एमविपिएसको गतिमा इन्टरनेट दिने ‘सुपर सस्तो प्याकेज’ समेत ल्याएको थियो तर यति बेला भने ग्राहकको फोन नै उठाउन नसक्ने अवस्थामा आई पुगेको छ ।

फाट्टफुट्ट इन्टरनेट सेवामा समस्या सबै सेवा प्रदायकहरूको आउँछ तर उनीहरू सँग छिट्टै सम्पर्क हुने र समाधान हुने एउटा राम्रो पक्ष पनि छ। त्यति मात्रै हैन प्रचारबाजीमा नलागेका तर गुणस्तरीय सेवा प्रदान गरिरहेका इन्टरनेट सेवा प्रदायकहरू पनि केही मात्रामा नभएका हैनन् छन् जसले पूर्व योजना अनुसार मर्मत गर्नुपर्ने ठाउँका सेवाग्राहीलाई पूर्व जानकारी गराउँछन् र सेवा सुचारु पश्चात् समेत जानकारी गराउँछन्।

यस्तै समुदायमा CG जस्ता चतुर र ठग सेवा प्रदायकहरू पनि छन् जसले न कुनै सेवा अवरुद्ध पूर्व जानकारी गराउँछन् न सेवा सुचारु मा नै, हुन त जानकारी नै गराएर चलाउनको लायक इन्टरनेट नै यसले कहिले पो दिन सकेको छ र ? CG Net को यस्तो किसिमको कमजोरी र लापर्वाहिले सेवाग्राहीमा मात्रै असर परेको छैन यसले पुरै नेपाली समाज, डिजिटल नेपालको पूर्वाधार विकास लगायतका आधारहरूको समेत खिल्ली उडाएको छ। राजनैतिक संरक्षण कै आधारमा जे पनि गर्नुहुने भन्ने मानसिकता बोकेको CG Group ले नेपाली इन्टरनेट जगतलाई मिठो ललिपप देखाएर नमिठो सङ्गले लोप्पा ख्वाएको छ।