३१ भाद्र २०८०, आईतवार
३१ भदाै, गोरखा । प्रतिनिधि सभाका सांसद डा.स्वर्णिम वाग्लेले नेपाली सेनाको गरिमामा आँच आउने काम कहिँकतैबाट कसैले गर्न नहुने बताएका छन् ।
शनिवार गोरखा सदरमुकाममा आयोजित पार्टीको गोरखा नगरपालिकाको भेला तथा आमसभालाई सम्बोधन गर्दै उनले सेनाको सम्बन्धमा आफूले बोल्दै नबोलेको विषयलाई उठाएर आफूविरुद्ध भ्रम फैलाउने षडयन्त्र भइरहेको समेत बताए ।
‘नेपाली सेनाका बारेमा भन्दै नभएको कुरा विपक्षीहरूले हल्ला गरिरहेका छन्, उनले भने, ‘सारा कुरा छोडेर देश बनाउनपर्छ भनेर होमिएका मान्छेहरूबाट त्यस्ता गैह्र जिम्मेवार कुराहरू आउँदैनन् ।’ डा.वाग्लेले सेनाको साँख जोगाउने काम सबैले गर्नुपर्नेमा समेत जोड दिए ।
‘नेपाल एकीकरणको बेलादेखि अभिछिन्न रूपमा जीवित रहेको एउटै मात्र संस्था नेपाली सेनाको हो, यसको साख जोगाउनुपर्छ कसैले मानमर्दन गर्नुहुँदैन, उनले भने, ‘भित्र केही सुधार गर्नुपर्ने कुराहरू छन् भने पनि प्रधानसेनापति मार्फत हामी राजनीतिककर्मीहरुले संसदबाट समन्वयात्मक ढङ्गले अगाडि लैजानुपर्छ ।’
प्रकाशित मिति: ३१ भाद्र २०८०, आईतवार
