८ भाद्र २०८०, शुक्रबार
८ भदाै, मकवानपुर । मकवानपुरका अग्रज साहित्यिक स्रष्टा एवम् शिक्षासेवी तुल्सी थापाको निधन भएको छ । चितवनस्थित पुरानो मेडिकल कलेजमा उपचारको क्रममा उनको शुक्रबार निधन भएको हो ।
मुटु, मृगौला र फोक्सोको समस्या पीडित ७८ वर्षीय थापामा केही दिनयता निमोनिया समेत देखिएको थियो । कथा, कविता र नाटकमा कलम चलाउने थापाका पछिल्ला समयमा दाना कविता लेखेर साहित्य क्षेत्रमा छुट्टै पहिचान बनाएका थिए ।
मकवानपुरका विभिन्न विद्यालयको प्रधानाध्यापक भई नेतृत्व गर्नुभएका थापा शिक्षण पेसाबाट निवृत्त भएपछि साहित्य र कलाको विकासमा लागेका थिए । भीम विराग सङ्गीत, साहित्य, कला प्रतिष्ठानका पूर्व अध्यक्षसमेत रहनुभएका थापाले सिमान्तकृत समुदाय चेपाङ समुदायको विकासमा लामो समयमा काम गरेका थिए । थापाको दाना कविता सङ्ग्रह ‘एक निमेष अनन्तको’ लगायतका कृति प्रकाशित छ । थापाको जन्म मकवानपुरको भैँसेमा २००२ सालमा भएको थियो ।
प्रतिष्ठानका सदस्य कन्यैयाकृष्ण श्रेष्ठका अनुसार स्वर्गीय थापाको छोरी बेलायतबाट नेपाल आएपछि मात्र थापाको अन्तिम संस्कारका बारेमा निर्णय हुन्छ ।
प्रकाशित मिति: ८ भाद्र २०८०, शुक्रबार
