२७ श्रावण २०८०, शनिबार
२७ श्रावण, एजेन्सी । अर्जेन्टिनी कप्तान लियोनल मेस्सी चम्किएपछि इन्टर मियामी लिग्स कप–२०२३ को सेमिफाइनलमा प्रवेश गरेको छ । घरेलु मैदानमा शनिबार बिहान भएको खेलमा मियामीले एफसी चार्लोटलाई ४–० गोलले हरायो ।
मियामीको जितमा मेस्सी, जोसेफ मार्टिनेज र रोबर्ट टेलरले एक एक गोल गरे । मियामीले अर्को गोल चार्लोटका एडिल्सन मालान्डाबाट आत्मघाती उपहार पाएको थियो । एकपक्षीय खेलमा मार्टिनेजले १२औँ मिनेटमा पेनाल्टीमा गोलको खाता खोले ।
टेलरले ३२औँ मिनेटमा गोल गर्दै टोलीको अग्रता दोब्बर बनाए । ७८औँ मिनेटमा अदिल्सन मालान्दाले आत्मघाती गोल गरेपछि मियामी थप बलियो बन्यो । त्यसपछि ८६औँ मिनेटमा मेस्सीले गोल गर्दै टोलीलाई सजिलै जिताए ।
मेस्सीको यो जारी प्रतियोगितामा आठौंगोल हो । यसै सिजन फ्रान्सको पेरिस सेन्ट जर्मेन (पीएसजी) छाडेर मियामी पुग्नुभएका मेस्सीले त्यहाँ सानदार प्रदर्शन गरिरहेका छन् । सेमिफाइनलमा मियामीले फिलाडेल्फिया युनियन र क्वेरेटारोको विजेतासँग प्रतिस्पर्धा गर्नेछ ।
प्रकाशित मिति: २७ श्रावण २०८०, शनिबार
