२६ श्रावण २०८०, शुक्रबार
२६ श्रावण, सङ्खुवासभा । सङ्खुवासभामा २ कैदीबन्दी मृत्यु प्रकरणमा प्रहरी सहायक निरीक्षक (असई) सहित १० जना प्रहरी पक्राउ परेका छन् ।
कारागारबाट मंगलबार राति भाग्ने क्रममा समातिएका २ कैदीबन्दीको मृत्यु भएको थियो । मृत्यु हुनेमा मादी नगरपालिका ५ का १९ वर्षीय विनोद तोलाङ्गी र नुवाकोट ककनी गाउँपालिका ७ का २८ वर्षीय आकाश बलामी थिए ।
प्रहरीले उनीहरूको कारागारमा भएको झडपमा मृत्यु भएको बताएको थियो । तर, सो घटनामा प्रहरीले नै संलग्न देखिएपछि कारागार सुरक्षामा खटिएका असईसहित १० जना प्रहरीलाई नियन्त्रणमा लिइएको जानकारी दिइएको छ ।
स्थानीयहरूले प्रहरीको निर्मम कुटपिटबाट उनीहरूको मृत्यु भएको बताएका थिए ।
सुरक्षा घेराभित्र दुईजना कैदीको शङ्कास्पद अवस्थामा मृत्यु भएपछि घटना अनुसन्धानका लागि कोशी प्रदेश प्रहरी कार्यालय (विराटनगर) बाट प्रहरी उपरीक्षक ऋषिराम कँडेलको नेतृत्वमा चार सदस्यीय समितिले अनुसन्धान गरिरहेको छ ।
चौतर्फी दबाब परेपछि सीसीटीभी फुटेज मगाएर अनुसन्धान गरिएपछि १० जना पक्राउ परेका हुन् ।
प्रकाशित मिति: २६ श्रावण २०८०, शुक्रबार
