७ श्रावण २०८०, आईतवार
७ श्रावण, काठमाडाैँ । परराष्ट्रमन्त्री एनपी साउदले नक्कली भुटानी शरणार्थी प्रकरणबारे अदालतको निर्णय महत्वपूर्ण हुने बताएका छन् ।
नेपाली कांग्रेसका केन्द्रीय सदस्यसमेत रहेका मन्त्री साउदले नेपालीलाई नक्कली भुटानी शरणार्थी बनाएको अभियोगमा कारागारमा रहेका पूर्वगृहमन्त्री बालकृष्ण खाणबारे धारणा राख्दै अदालतको निर्णय पर्खनुपर्ने बताए ।
‘भुटानी शरणार्थीबारे धेरै चर्चा भएको छ। कहिलेकाहीँ केही घटना र अपराध यस्ता हुन्छन्। कोही समातियो भने त्यही दिन पार्टीले निकाल्दिए हुन्छ । कोही छानबिनमा नगएर भाग्यो भने पनि पार्टीले निकाले हुन्छ। तर छानबिन भइरहेको र अनुसन्धानमा सहयोग गरिरहेकोलाई अदालतको निर्णय पर्खिनुपर्छ।’ उनले भने ।
त्यसैगरी, खाणको निलम्बनबारे हतार गर्नु नहुने धारणा पनि राखेका छन् । उनले भनेका छन्, ‘‘हतारमा निर्णय नगरौं। बाहिर पत्रिकाले लेखेर मात्र हुन्न। त्यसले पार्टीको हित गर्दैन। अदालतको निर्णय कुर्नुपर्छ।’
प्रकाशित मिति: ७ श्रावण २०८०, आईतवार
