भारतले दियो ५० स्कूलबस र ३४ एम्बुलेन्स

३१ असार, काठमाडौं ।  भारत सरकारले नेपाललाई ५० वटा स्कूल बस र ३४ वटा एम्बुलेन्स हस्तान्तरण गरेको छ । आइतबार काठमाडौंस्थति भारतीय राजदूतावास आयोजित कार्यक्रममा ५० वटा स्कूल र ३४ वटा स्वास्थ्य संस्थालाई सवारीसाधन उपलब्ध गराइएको हो । यी सबै सवारीसाधन उपहारमा प्राप्त भएका हुन् । आइतबार नेपालका लागि भारतीय राजदूत नवीन श्रीवास्तवको उपस्थितिमा शिक्षा, विज्ञान तथा प्रविधि मन्त्री कुमार राईलाई उक्त सवारीसाधन हस्तान्तरण गरिएको थियो । राजदूत श्रीवास्तवले मन्त्री राईलाई चाबी हस्तान्तरण गरेपछि मन्त्री राईले सबै स्कूलहरुलाई चाबी हस्तान्तरण गरेका थिए । दुर्गम तथा राजधानीका स्कूलहरुलाई ती बस उपलब्ध गराइएको हो । सवारीसाधन हस्तान्तरण कार्यक्रममा राजदूत श्रीवास्तवले एम्बुलेन्स तथा स्कुुल बसको हस्तान्तरणपछि नेपालको शिक्षा र स्वास्थ्य पूर्वाधारमा सहयोग मिल्ने बताए । उनले उनले यहाँको शिक्षा र स्वास्थ्य थप सुविधायुक्त हुने बताउँदै आगामी दिनमा नेपाल भारत साझेदारी निरन्तर रहिरहने जानकारी दिए । सवारीसाधन हस्तान्तरण कार्यक्रममा विभिन्न जिल्लाका जनप्रतिनिधि, प्रधानाध्यापक, शिक्षक, विद्यालय व्यवस्थापन समितिका प्रतिनिधिलगायतको उपस्थिति थियो । भारतले सन् १९९४ देखि नेपाललाई एम्बुलेन्स तथा स्कुल बस उपहार दिँदै आइरहेको छ । आइतबार हस्तान्तरण गरेकोसहित भारतले हालसम्म २३४ वटा स्कूल बस र ९७४ वटा एम्बुलेन्स नेपाललाई हस्तान्तरण गरेको छ ।